BILBO, BIZKAIA. Munduko euskal etxeetako gazteendako Gaztemundu 2019 programa ari dira egiten aste huntan Bilbon Argentina, Estatu Batuak eta Uruguaiko 15 gazte, "Euskal etxeen kudeaketa" gai harturik. Ortziralean bukatuko dute, asteburuan txangoak eginen dituzte Euskal Herria hobeki ezagutzeko, Bilbotik Nafarroa eta Lapurdiko kostaldera, Arabar Errioxara eta Zumaia eta Donostiara; eta ondorik, asteartean, urriaren 2tik 4ra Bilboko Euskalduna jauregian obratuko den Euskal Gizataldeen VII. Mundu-Batzarrarekin bat eginen dute. Euskal etxea duten munduko 25 herrialdetako delegatuak deitu dituzte bilkura honetara, hiru erresumakoek. Lau urtetarik behin egiten da eta Urkullu lehendakariak emanen dio hastapena eta akabera. WASHINGTON DC, AEB. Estatu Batuetako Gobernuak folk eta arte tradizionalen atalean ematen duen sari behinena da NEA (National Endowment for the Arts) erakundearen "National Heritage Fellowship " delakoa. Joan den astean Washington hiriburuko Kongresuko Liburutegian egin ekitaldi batean, Dan Ansotegui euskal musikari boisetarrari eman diote, euskal-amerikar kulturaren alde egin lanarendako. Euskara ederki mintzo du Dan-ek, musikaria izanik, trikitixa, txistua, panderoa eta atabalak jotzen ditu, Boiseko Gernika taberna eta Basque Market estorra sortu zituen, baita Txantxangorriak euskal musika eskola ere, eta trikitixa irakaslea da, Oinkariko euskal dantzaria izan da, eta beti euskal kulturaren sostengatzaile. Zorionak zuri, Dan, eta AEBetako euskaldun guzier ohore honen gatik! MONTPELLIER, FRANTZIA. Igande huntan eginen dute Montpellierko Euskaldunen Urteroko Pesta, hiriko Eskualdunak elkartea antolatzaile. Zuraideko Jean-Baptiste Munho apeza eta Jean-Louis Bergara eta Beñat Chaubadindeguy joanen dira, musikari. Pariseko Anaiki gizon-koralekoek ere kontzertua emanen dute bezperan, larunbat arratsean Lattes-ko St Bernard elizan, euskal etxekoek komitaturik. Igandean, ohi bezala, pesta Clapiers-en ospatuko da (Paraguai karrika 1 helbidean) 10etarik goiti, meza 10:45etan, 11:45etan aperitifa, eta 13ak aldera bazkaria, Anaikikoak ere partaide. Kantuak, dantza eta mutxikoak... urte guzizko giro ederrarekin hain segur. Izena aitzinetik behar da eman, helduek 25 euro eta haurrek 12. Ongi ospatu eta on egin!