Ibarrungo bestak asteburuan Udazkenari hasiera on baten emaiteko, urtero bezala ibarrundar gazteek aurkeztu daukute programa bikain bat San Mikele ospatu nahizik. Ostiralean (20:00), betiko xerri-kumearen jatea Inharria baserrian, Bideoak taldeak alaiturik. Gauazko etxeratzea taxi baten bidez urririk. Larunbatean (14:00) mus txapelketa Zaldubi Ikastolak antolaturik Inharrian, ber denboran abiatuko dira palantxazko 4 finalak bat bestearen segidan. Urtxuko Xoriak dantza ikusgarria (19:30), zintzur bustitzea Bost Axolak animaturik (20:30), Guda Dantza taldearen kontzertua (22:00). Gauerdi pasa eta Harrabost taldearen kontzertu/dantzaldia. Igandean (10:00) abian da 5 kilometroko lasterkaldia, bularreko minbiziaren aurka (denak arrosa kolorez jantzirik), meza nagusia (10:30) Emak- Hor-ek animatua, aperitifa (12:00), Emak-Hor, Senperen Kantuz eta Triki Zaldubik alaiturik, haurrendako Pottoka itzulia (16:00), tenore berean pilota partida, "Magik Chaz" hipnotizatzailea (16:30), kantaldia Julen Borthaire eta Eneko Lamothe (18:00), hauen ondotik Zortzi taldea, zintzur-bustitzea Bizounours txarangak alaiturik, Legatza jatea Le Fronton jatetxean (20:00), DJ "Les Inconnus" lemarekin (22:00). Astelehenean Artisau eta bertako ekoizleen merkatua (9:00), pilota partida (11:00), Koblalariak Senpereko taldearen kantaldia (18:30), Kuxkuxtu txarangak alaituriko poteoa Bonnet jatetxean (19:30) eta han berean Bakalau jatea (20:00). Komitearen desira da ere, giro herrikoi eta euskaldun bat izan dadin eta hortako euskaraz hitz egin eta kanta, besta on deneri. Erlauntza Abesbatza elizan ostegunean Kontzertua iraganen da irailaren 26an (21:00), Saratar kantari talde hunen boz xoragarriekin gozatzeko parada dugu. Gure auzo herritik heldu dira 20 bat kidetako koru mistoa, aldi huntan ere lorietan errezebituko ditugu. Bertzalde, ikusgarria urririk eskainia da, nola beraz parte ez hartu? Mus lehiaketa larunbatean Ibarrungo bestakari, Zaldubi Ikastolak antolatzen du mus lehiaketa Inharrian, irailaren 28an larunbatean arratsaldean (14:00) izen emaiteak, lehiaketa (15:00). Parte hartzea 10€ bakoitxak, lehen saria 400€ eta anitz sari bertzalde. Besta giroa betean, "hor dago ta idoki" entzun behar gintuzke, baserri xoragarri horren barnean. Espainol dantza Larrekon larunbatean Porompompon deituriko espainol dantzaren errepertorio osoa ikusten ahalko da: klasikoa, folklorikoa eta XVIII. mendetik egun arteko flamenkoa, Catalina Gommes koreografoari esker. Irailaren 28an (20:30), Calle San Juan & Alliance 64 elkarteak dira antolatzaile lanetan. Astelehenean ikusgarria Larrekon "Jainkoa laikoa balitz?": horra zer galdera egiten daukun M. Christine Bernard teologoak bere ikusgarrian, Larreko antzokian, irailaren 30ean (20:00). Goi mailako teologo hunek, bakarkako antzerki baten moduan bere mezua helarazi nahi du eta bizkitartean galdera asko sortarazten du publikoaren baitan. Hortarako ikusgarriaren ondotik debate bat izanen da artistarekin. Aintzina Xutik kostaldeko giristino taldea eta Elizan Mintza diozesako kolektiboa dira ekimen hunen antolatzaileak. Baliagarri ditaizken gogoeta askoren egiteko parada eskainia da dohainik. Xehetasun gehiago: www.mariechristinebernard.org webgunean. Heriotze Egun guti barne hirugarren aldikotz eliza mukurru bete da, Xopereneko Lopez familiako alaba Hélène Ubiriaren ehorzketen kari. 60 urte egiteko puntuan zen heriotzeak jo duelarik bere familiaz ongi inguraturik. Etxeko mahastian eraikia zuten beren kafia, Julien bere senarrarekin baita Frantxa eta Ramuntxo haurrekin. Denborarik handiena etxeko andere gisa eraman du xumeki eta maitasuna hedatuz, jaun erretorak azpimarratu bezala, bere bizitza beti bertzeeri itzulia izan da. Julien eta Ramuntxo biak suhiltzaile izanik, herriko suhiltzaileek ere parte hartu dute beren atxikimendua erakutsiz. Gure aldetik, dolumin bizienak penetan gelditzen diren familia eta ahaideeri.