Herriko bestak ditugu ortziraletik asteartera, agorrilaren 5tik 9ra. Egitarauaren liburuxka eskuratua dukezue, etxe guzietara igorria izan baita, beraz zozoki errepikatzeko orde, zuen berriketariak ariketa bat eman dako bere buruari: gertakariak lerrokatuko ditu bertsutan, hamarreko handia erabiliz, neurri gisa. Are, bota!

Ortziralea

Aperitifa, edari fresko,

Alde izanen aroa,

Plaza handian, bai luza gabe,

Jendea bero beroa,

Natt eta Watson soinulariak,

Ongi pizteko giroa,

Eta ondotik tripa jokoa,

Ogian da zikiroa,

Dantzarendako Kontrabandak du

Botako soinu zoroa!

Ibiakoitza

Merkatu eta bazkari hauta,

Apaintzaile Basaizea,

Goizik gosetzen direnendako

Xingar eta arroltzea,

Eta hortako zoin egoki den

Islan dugun baratzea.

Artzain xakurrak, elkarteekin,

Berriz zintzur bustitzea

Soinuz Kilimak eta Rodeo

DJ Ttal dela bertzea.

Igandea

Karrikan kurri sei ziganteak,

Errex dute ez da malda,

Bixentainean presoen alde

Bazkaria eta kalda,

Gero antzerki, irri kantuak

Omentzeko Porru Salda,

Kiki Bordatxo, euskal jauziak

Eta talo bana galda!

Holako De luxe taldearekin,

Gauaz dantzatzen ahal da!

Astelehena

Gaineko plazan pilota giro

Esku huskako finalean,

Aperitifa besta taldeak

Eskaini edariekilan,

Hango guzien kontentatzeko

Segur ukanen duela lan.

Bazkari, soinu Xebaxtienekin,

Ez du huts egin sekulan.

Ilundu eta, besta fierra

Ostatu den “Den Bezalan”.

Asteartea

Pilotazale goizez jadanik

Zoazi errebotera,

Arratsaldean berriz pilota,

Joko Garbi, hots xistera.

Arratsez joan Bixentainerat,

Kontzertuen entzutera,

Tiri ta Terry eta Kuxkuxtuz

Ase on bat egitera.

Goza ditzagun herriko bestak,

Denak plazarat atera!

Ño! Zer bertsuak! Eta ez ahantz ere adinekoen atsalaskaria asteazken arratsaldez eginen dela Manexenean (16:00). Izenak eman harat deituz: 05-59-37-41-68.