Agorril huntako animazioak Donapaleun!

Agorril huntan, Donapaleun animazio desberdinak proposatuak dira. Huna hitzordu zonbait.

Deia aipatu bezala joan den astean, joko garbi lehiaketa uztail eta agorrilean jokatzen da asteazken guziz pilota plazan (17:30). Ondotik, taloak eta edatekoak, Amikuzeko ikastolak proposatuko ditu lekuan berean.

Lekuko ekoizleen merkatua agorrilaren 6an, ibiakoitzez, antolatua da abere plazan (9:00-13:00).

Bestalde, Argitzek zinema gaualdia antolatzen du kanpoan, pilota plazan, agorrilaren 15ean, astelehenez (20:00). Lehenik, Amelia elkarteak jokoak proposatuko ditu eta ondotik “Shaun le Mouton 2, la ferme contre attaque” filma erakutsia izanen da. Irri egiteko parada ona erraiten dutenaz!

1951z geroztik antolatua den Euskal indar joko jaialdia, aurten ere ikusteko parada emana da agorrilaren 21ean, igandez (15:00), Donapaleuko pilota plazan.

Bestalde Amikuze dantzan elkarteak dantza errepikak proposatzen ditu, agorrilean, astearte guziz (20:45), herriko plazan.

Bukatzeko, Gogotik kantu abesbatzak kantaldia emanen du, agorrilaren 27an (21:00), Donapaleun.

Baxe Nafarroako erakustokian bi hitzaldi

Baxe Nafarroako erakustokiak, udako hitzaldiak segitzen ditu. Agorril huntan bi gaualdi proposatzen ditu: agorrilaren 11n, ostegunez, Christian Normand gure prehistoriaz mintzatuko da, orduko bizimoldeak azalduz eta agorrilaren 25ean, ostegunez, Ximun Larrek, beren aitatxiren historia lehen gerla denboran kondatuko dauku “Au Bois de la Tuerie: sur les traces d’un poilu basque mort au front en 1915”. Hitzaldiak hasiko dira Bideaken (20:30). Sartzea urririk.

Izarrei begira agorrilaren 5ean Donapaleun!

Kostaldeko astronomia elkarteak gaualdia antolatzen du, Donapaleun agorrilaren 5ean (22:00), skate park gunean, Amikuzeko mediatekaren partaidetzarekin. Elkartearen tresneriari esker, zeruari eta izarrei beha egoiteko parada emana zauku. Hitzordua lekuan berean emana da (22:00) edo mediatekan hamabost minutu lehenago.