Herriz Herri - Ziburu (L) | 2022ko Agorrilaren 04a

Odol emaite - Ravel gogoan - Erakusketa eta beste - Laguntzak gazteentzat

Odol emaite

Uda betean ere odola eskasten da artategietan. Odol bilketak beharrezkoak izaiten dira beraz. Ziburun, batto izanen da agorrilaren 16an, asteartearekin (9:00-12:30), Errepira aldeko bilgunean. Tokia segurtatzen ahal da Internet sarearen bitartez.

Ravel gogoan

Hurbiltzen ari zauku Maurice Ravel zena omenduz muntatzen den festibala. Ziburu ere partzuer, eta nola ez musikagile famatu hori Ziburun sortu baitzen alabainan! Agorrilaren 20an besta handia izanen baita Donibanen, Ziburuko ziganteak han izanen dira. Ondotik, hiru kontzertu Ziburuko elizan, agorrilak 21 eta 30, beste bat toki berean, irailak 7 eta sailaren bururatzeko azkena irailak 10, Errepira aldeko bilgunean.

Erakusketa eta beste

Agorrilaren 20a arte, erakusketa berezia izanen da Koxe Arbiza plazan, ortzirale eta larunbatetan. Argazki, margolan, xixelkadura eta beste, zernahi ederlan ikusgai besta giro batean! Toki berean, larunbat huntan (11:00), Kanta Donibane. Ondotik, Almonte Peña, Espainiako dantza askorekin. Bestalde, agorrileko bigarren asteburuan, Untxin auzoaldeko bestak. Andredena Maria egunean, selauru hustea herriko pilota plazan. Agorrilaren 21ean, Zokoan, xipiroi prestatzaileen zoin-gehiagoka. 28an, herriko pilota plazan, Begiraleak elkarteak muntatu euskal dantza ikusgarria.

Laguntzak gazteentzat

Herriko Etxeak plazaratu baitu bere udako aldizkaria, oroitarazten du gazteentzat laguntza bereziak badirela, besteak beste autoen gidatzeko permisa nahi badute erdietsi, edo BAFA formakuntza segitu edo berdin bizikleta baten erosteko.

Email Buffer Facebook Google Twitter Pinterest LinkedIn Digg StumbleUpon Tumblr

3657. zbk

Gure Hitza | 2022/08/04

Bestaz-besta?

Janbattitt Dirassar

Bestak, pestak, festak, ez dugu denek beti hitz bera erabiltzen, bainan denak gauza beraz ari gira, denek, edo kasik denek, hoin maite ditugun besta horietaz! Bi urte eta erdiz nunbait han besta frango edo ez dira batere egin, edo arras murrixki, ezagun zen bazela hor eskas handia! Orain bestak berriz hor dira eta badute ikaragarriko arrakasta! Denek gogoan nolako mundua bildu den Iruñako San Ferminetan, gauza bera egun hauetan Baionako bestetan, beren 90 urteak guziz airoski ospatzen zituztela! Hoinbeste jende hoin harro, gehienak xuri eta gorriz jantziak! Egitaraua ere gisa hartakoa! Hor aipatzen ditugu aspaldian fama handi-handia duten bestak bainan beste anitzek ere nola ez dituzte bazterrak harrotu, izan Donibane Lohizunen, Hazparnen, Uztaritzen, Maulen, Donapaleun, Pausun eta beste anitz tokitan! Agorrileko Andredena Mariak ekarriko dituenak ere gaitzak izanen dira itxura guzien arabera, aroa batere alde izanez geroz segurik! Bai, jendea azkarki atxikia dago herriko b...

Irakurri segida


Gurekin harremanetan sar




segurtasun kodea

Herria Euskal Astekaria - Jacques Laffitte, 11 - 64100 BAIONA | tel: 05 59 25 62 85 | Legezko oharrak | Diseinua eta programazioa: iF Diseinuak - 2016