Lehendakariak prefetak bildu ditu Parisen eta besteak beste erran diote lege berri bat nahi lukeela martxan ezarri heldu den urte hortan eta hori etorkinak gogoan. Aitortuz sail hortan badela molde txar frango ez direnak hola eta hola alde bat onesten ahal. Ez ahantz haatik Macron kargutan jarria dela duela bost urte eta erdi. Azkenean ohartzen da beraz delako molde txar horieri.

Dena den, nolako legea litakeen, eta nola pasaraz lezakeen, gisa hortako gehiengoa nolazpait segurtaturik, hori ez da ageri. Bi xede nagusi aipagai halere, alde batetik hobeki laguntzea gure artean xintxoki kokatuak diren etorkinak eta bestetik larderia gehiago agertzea, Frantziatik kanpo despedituz, paperrik gabe egoki direnentzat, arrunt gure bizkar nolazpait. Xede onak beharbada anitzen gustuko bainan nola gauzatzen ahalko diren hori besterik da. Eskuin eta ezker arrunt ikusmolde desberdinak agertzen-eta, eta biziki aspaldian, gai minbera horietaz.

Errepublikano eskuindar alderdiko deputatu eta zenaturrak Miarritzen bildu dira. Hori zuten beren uda huntako gogoetaldi saila, ontsalaz urte guziz muntatzen dutena, aurten arras berezia halere, ez dute aise ukatzen ahal, alderdiburu berri baten hautatzeko tenorea hurbiltzen ari baitzaiote. Hautu hori heldu den abenduan dute trenkatu beharra bainan oraindanik ez dute besterik gogoan. Miarritzen ere denek hori zuten gogoan, edo deblauki edo erdi isilka bezala. Alde batetik alderdiburu berri baten hautatzea beraz bainan denbora berean ahal bezen garbi finkatzea alderdiak nolako bidea hartu behar duen, beren artean ez baitira hain ados alabainan. Duela bi aste hemen berean ginion bezala, bi hautagai agertzen dira ausartenak, Eric Ciotti eta Bruno Retailleau bainan Miarritzeko biltzar hortan hirugarren bat anitz mintzatu da, alderdia errotik berritu nahi omen duena, Aurélien Pradié, Lot departamenduko deputatua, oraino arras gaztea...

Lurraldeburuak bildu dira Vichy hirian, biziki ur ona ausarki edaten omen den herri alegera batean. Elisabeth Borne gobernuburua bera ere izan zaiote bisitaz. Beren arteko harremanak ez dira beti hain lasaiak izan. Aldi huntan hobeak iduriz segurik. Ez kexa eta ez kexa, denek elgarrekin behar dugu lanean arizan, batzuk eta bestek holako zerbait dute gehienik erakustera eman beren solasetan. Gobernuburua kasik lausenguka beraz, doi bat txalotua ere izaiteraino.

Izurritea berriz azkartzen ari da, lekuka segurik, eta bereziki Frantzia iparraldean. Berriz eraso handi bat beharko ote den jasan, batzuk ez dute beste beldurrik. Ikerle askok diotenaz udazkena sasoin minbera eta kezkagarria izaiten ahal.