Azkenean, menperatuak izan dira beraz Bordele alde hortako sute handiak, suhiltzaileak erne egoki haatik, gutien ustean, idortearekin bereziki, sua berriz lotzen ahal baita han edo hemen. Menperatuak ere Bretainiako suteak. Beste bospasei segurik piztu dira haatik Frantzia behere hortan, hala nola Hérault eta Ardèche departamenduetan, makur handiak eginez! Eta hor gaindi, ikerleen arabera, sua norbaitek piztua, mendekioz eta tzarkeriaz! Gizon bat atxilotua izan da, lekuko batzueri esker, su-pizle guziz atrebitua. Beste bat ere, eskualde berean, kaxketadunek begietan hartua zutena, hiru urte nunbait han tirahala su pizten ari zena! Gehiago dena, hauxe da gauza harrigarria, bera suhiltzailea izanki! Balentria omen zitzaion su baten piztea, gero bera ere su hura hil nahiz ari behar zelarik! Arrunt biziatua, tokiak untsa ezagutzen, jakinki nun zen sua aisenik lotzen eta gero burrustan hedatzen! Holakoak ere izaiten ahal direla, neke da sinestea eta bizkitartean...

Azken egun horietan, ikaragarriko mugimendua izan da errebide, autobide eta trein-bideetan! Aireportuetan ere gainerat! Sasoinak manatzen duen bezala. Zernahi udatiar harat eta hunat ibilki, andana gaitza etxera ari, oporretan egonik, oraino gehiago oporretara joan preseski. Treinen geltokietan, joan den ortziralean, lau ehun mila jende, asteburu osoan milioi bat baino gehiago! Bidetan, ikaragarriko ilarrak, autoa autoaren gainean! Sasoina ederki badoa beraz, anitz tokitan izurritearen aitzineko urtetan bezenbat kanpotiar! Oro har, hein bertsua segurik ba! Estranjerak ere hor, egiazko estranjerak, Frantziatik kanpo bizi direnak ez direlarik oporretan! Bazterrak harro beraz, ikusiz hoinbeste udatiar. Denek ez omen badute ere, frantsesek bereziki, lehen bezenbat xahutzen. Sosari kasu eginez ari, bizia kariotu delakotz eta anitzek uste gehiago kariotuko dela ondoko hilabetetan. Gobernuko diruzain nagusiak ere ez baitu funtsean besterik erraiten, erakustera emanez halere heldu den urtea...