EHZ festibala Irisarrin iraganen da ekainaren 30etik uztailaren 2ra iraunen du. Antolatzaileek zioten bezala: "Sugea bezala EHZ-k sigi-saga segitzen du bere bidea, Arrosa, Idauze-Mendi, Heleta eta Lekornetik iragan ondotik, aurten, laugarren urtez Irisarrin. 27 urtez eraikitako ondarean sustraituz, EHZ etengabe azal berritzen da: gaur eta biharko belaunaldiek, elkarlanean, esperientziak eta koloreak elkar-korapilaturik, EHZ-ren Herensugea gorpuzten dute. Urratsez urrats eta herriz herri, EHZ-ren Herensugeak ideia, praktika eta soinu anitzak zintzilikatzen segitzen du ibiltariaren gerrenaren adarretan. Biharko belaunaldiek Herensugea xingola berriekin janzten segi dezatela.

Berriz ere, denek osatzen dugun Herensugea plazara jautsiko da, Irisarrin, gure kulturaren pindarrak zazpi haizetara ufatzeko, auzolanaren sua pizteko eta euskaratik euskarara arnasteko".

Urtean zehar EHZ-ak Euskal Herriko eragileekin elkarlanean hainbat proiektu eramaten ditu. Horien artean, joan den urtean Ipar Euskal Herriko ikastetxe anitzetan euskal kulturaren inguruko saio pedagogikoak antolatu ditu, urririk, aurten esperientzia horren errepikatzera doaz. Oroitarazi dute urtean zehar Erasoen Kontrako Brigadak (EKB) eta festibaleko laguntzaileek erasoen kontrako protokoloa landu dutela, festibal denboran izan daitezkeen jarrera sexistak, homofoboak eta arrazistak saihesteko.

Aurtengo edizioari dagokionez, formula bera atxikia da. Egunean zehar, urririk, plazan mota desberdinetako animazioak iraganen dira (zirko, kontzertu, haurren xokoa...). Ospitalea kultur etxean trukatzeko parada izanen da, hitzaldi, mahai inguru eta tailerren bidez. Arratsean, bi eszenatan banatua izanen den pentzean kontzertuek segituko dute. Krisia bete-betean den garai huntan, eginahal guziak eginen dira festibala denentzat eskuragarria izan dadin.

Festibalera hurbiltzeko autobusak antolatuak dira, 4 toki desberdinetatik abiatuko direnak, geldialdiak eginez: Maule-Donapaleu, Baiona-Hazparne, Garazi-Baigorri-Arrosa-Ortzaize eta Hendaia-Urruña-Azkaine-Zuraide-Ezpeleta-Itsasu, 6€ kostako da.

Bestalde festibaleko txartelak www.ehz.eus bidez eros daitezke edo Irisarrin berean.

Programazioaren aldetik, azken urteetako ildotik segitzen da, ahal bezain musika estilo anitza proposatuz, doinu eta adierazpen mota desberdinak deskubritzeko eta sorkuntza berriak ezagutzeko parada emanez. Egitaraua aberatsa izanez, sobera luze litzateke Irisarrira etorriko diren musika talde guzien zerrenda agertzea. Aipatzekotan igandean, urtero bezala, EHLGk antolatu zikiroa iraganen dena, Airetik salan.

Holako gertakaria ezin da antolatu laguntzailerik gabe, eskukaldi baten emaiteko prest denak ehztxandak@gmail.com egin dezala.