Jondone kari urtero bezala, ekainaren 22tik 26a arte herriko bestak iraganen dira. Gomita luzatua da gorriz eta beltzez jantzirik etortzea, kantuz eta dantzan aritzeko gogoarekin. Egitarau aberatsa proposatua da, zenbaitzuk aipatzekotan ostegunarekin Ducontenian kitorik iraganen den kontzertua Neomak emazte taldearekin (21:30) eta Donibaneko suak larunbatarekin eliza aitzinean iraganen direnak (22:00).

Eskoletako ikasleek besten idekitzearen karietara, Herriko Etxeko balkoitik Xanpunek egin bertsuak kantatuko dituzte. Bertsu hauek, 1997ko martxoan Herria aldizkarian argitaratu ziren, "Itzuliño bat Donibane Lohizunen gaindi" izenarekin.

Nork ez ote du ikusi edo bederen famarik entzun

Zoin eder eta zoragarria zu, Donibane Lohizun?

Edertasuna eta gainerat zer historia duzun!

Hau ikusteak berak gizon bat egin dezake jakintsun.

Alde batetik itsasoa du, bertze aldetik mendiak.

Zuri begira akitu gabe alha ditazke begiak.

Izar itxura ematen dautzu goiz-albak utzi argiak,

Eta urrezko jantzi eder bat iguzki-sartze gorriak.

Arrantzaleak, baserritarrak eta berdin hiritarrak,

Elgarretarik bildu ditzagun gure herriko indarrak.

Bere lekua atxiki dezan gure hizkuntza zaharrak,

Beti gehiago distiratzeko Donibaneko izarrak.