Egun eta bihar | 2023ko Ekainaren 22a
Nahaskeriak
A.E
Noiznahi, kasik egun guziz erraiten ahal da, zernahi nahaskeria aipatzen dira han eta hemen, batean hau eta bestean hura! Frangotan ergelkeria hutsak, iduriz segurik, askotan gertakari pisuagoak, arras gogoetagarriak. Noiz izan ote orain bezainbat? Sekulan, diote batzuk! Hala nola arrangura frango agertu den Marianne elkarteak banatzen dituen diru-laguntza berezi horiekin. Marlène Schiappa ere, gobernuan dena, saltsaren erdian ezarriz, berak goraki diolarik haatik deus makurrik ez duela egin, beti legez-lege arizana dela. Burua gora agertzen ahal dela noranahi! Noizbait nunbaitik jakinen ote da egia? Batzuk begietan dituzte macrontiarrak, aise lerratzen direla holako bide txarretarat. Ez dira haatik denak nahasi behar, gauza jakina alderdi guzietan, edo gehienetan segurik, izan dela eta beti badela denetarik! Egia izan behar da halere macrontiar zonbaitek uste ukan dutela hor gaindi, Macron biziki gora ezarriz, jainko ttipi bat balitz bezala, berak beti garbi aterako zirela, nehor ez menturatuko heien apaltzera ez eta den gutienik kitzikatzera. Gisa guziz ez gira hortan, gauza frango kanbiatu da eta aitzina kanbiatzen ari. Batzuk, espantua merke, uste badute ere besteak baino aise gehiago direla.
