Hogeita hamar bat pertsona bildu dira Urepelen, aitzineko igande goizean, Iturritik elkarteak deiturik, Urepeleko Herriko Etxearen laguntza aktiboarekin. Hainbat taldetan antolaturik, Lohitzeko erreka bazterrak garbitu dituzte Urepeleraino. Tona erditik goiti hondakin 3 orenez. Plastikoa, laborantxa plastiko beltz zaharrak, pneumatikoak, nylonezko hariak, etxetresna elektrikoen karkasak... Hondakin zahar anitz eta zenbait berriagoak: Bereziartua saltegiak eskaini zituen zaku handiak betetzeko doia.

Iturritik elkarteak Aldudeko ibarreko erreken zaintzeari buruzko sentsibilizazioa du helburu, Urepelen antolatzen zuen bere lehen ekintza, pixkanaka ibaian behera egiteko xedearekin.

Bilketaren ondotik, Urepeleko Herriko Etxeak eta Den Bezala jatetxeak eskaini aperitiboa egin dute. Parte hartzaileetako batek erran duen bezala: "Erreka aberastasun bat da, biltzen den kilo bakotxa irabazia da eta horrek zoriontsu egiten gitu". Hurrengo ekintzaren data zehaztu bezain laster jakinaraziko da!