Mendikleta

Erran bezala, ekainaren 25ean, igandean beraz, iraganen da Mendikletaren 9. edizioa, Ortzaizeko ikastolak antolaturik. Hiru ibilbide, mendiko bizikletaz: 23km, 35km eta 45km, Artzamendiko mazeletan. Eta bestalde oinezkoentzat bi ibilaldi: 8km eta 15km. Izen emaitea tokian berean 7:30etatik goiti (10€ bizikletarientzat eta 6€ oinezkoentzat). Eguerditan, tokian berean jateko posibilitatea, denentzat.

Bidarraitarren eguna

Lerroak aski argalak ziren joan den larunbatean, elkarte batzuetatik nehor ez baita agertu, eta zabalagoki ere jendeak ez du halako interesa agertu egun horrentzat. Domaia! Pantxo Antxordoquiren inguruan, dozena bat haur halere bildu da, Baztango errekako biodibertsitatearen ezagutza egiteko. Bestalde, hamabortz lagun eta haur batzuk bildu dira Baztangoko erreka eta hunen bazterrak garbitzeko, Gorri-Gorria eta Infernuko zubiaren artean. Bildu da puska zikin frango, plastikak, burdinak eta beste. Gisa hortako ekintza baten egitea baliosa da. Erreberritu beharko den esperientzia. Bertzalde, presentatua izan den oren bateko film-dokumentala gain gainetik preziatua izan da. Entzun ditugu Beñat Maña gauazko lanaz mintzo, Ñoel Urdaburu mendiko artzaintzaz, Angèle Arrus Harpeko Sainduaz eta Fanny Arrabit Herriko Etxeko idazkaritzaz. Dokumentu arraroak! Liburutegiak, bere aldetik, taula pedagogikoak muntatuak zituen, uraren baliostasunaz: sekula baino premiatsuagoa den gaia. Eta hor ginen guziek bazkari partekatua gozatu dugu airostasunean.