Aldi huntan hautatu dut Véronique Margron serorandere dominikarrak (CORREFeko lehendakaria) "Un moment de vérité" argitaratu liburutik (Ed. Albin Michel) atera erakaspenak zuenganatzea. Bere ustez, Sauvé txostenak eragin lurrikararen ondorioz, "Eliza larrialdi egoeran dago". Praktika ebanjelikoagoetara itzultzeko garaia da, apalagoetara dudarik gabe, baina baita pertsonen errealitatetik, sufrimendutik eta itxaropenetarik hurbilago dauden praktiketara ere. Oroz gainetik bizitzeko artea den kristautasun baterantz jotzeko ordua da. Altxatzea, obra kopuru bat aldi berean egitea da, denak lehentasun berdinekoak. Hamabi aipatzen ditu, Herkulesen hamabi lanen idurira, baina denak batera eramaitea da kontua.

1/ Biktimak erdigunean ezarri - Lehenbiziko gauza justizia egitea da, berreraikitze eta arraberritze bidaia luze eta dudazko horretan laguntzea, eta, bide batez, beraiekin bilatu gaur egun Elizan zer egin behar den horrelakorik berriz gerta ez dadin. Ezinbestekoa da, halaber, hala nahi duten biktimekin teologikoki lan egitea, teologia katolikoaren oinarrizko kategoriak berriz ikustea, hala nola Eliza ama, eukaristiaren zentzua eta apezaren lekua, barkamena, etab... Komeni da, halaber, nahasdura hobendun batetik libratzea: sexu-erasoa ez da kontinentzia eta kastitate nahiaren kontrako delitua, baizik eta heldugabe baten kontrako krimena, bere osotasun fisiko, psikiko eta izpiritualean gerizatu behar litekeelarik.

2/ Apezaren irudia desakralizatu - Emazteen gorputzaren kontrolak eta apezaren irudiaren handiesteak, sakratuaren gizon gisa, apezaren estatus sozial bat ezarri zuten luzaz, gizartearen bilakaerak kolpean hegaldarazi duena. Huntaz akta hartu behar da.

3/ "Sistema klerikala" deseraiki - Kontua da Eliza egiteko beste molde bat asmatzea eta bataiatuen apezgo komunari zentzu osoa emaitea, laikoak gobernantzari eta talde-lankidetzari juntatuz, agintaritza plurala berreskuratzeko.

4/ Emazteen lekua sustatu - Tradizioak errotu emaztearen irudi hortarik jalgi behar da, Ama Birjinari erreferentzia eginez eratua, ezabatze eta gibelatze isilak definitua, gizonen boterearen menpeko- edo azpiko-tasunera darama. Klerikalismoari buru egitea ez da ardietsiko emazteak gabe, emazteak erantzukizun guzietara deitu gabe.

5/ Krisia mutazio bilakatu - Elizak erabaki behar du bere ohiturak errotik birmoldatzea. Michel de Cerreau teologoak "haustura ezartzailea" aipatzen du. Segurtasun hetsietarik urrun, beilariak girela beti eta beti gogorarazten duten erran-moldeak asmatzea da kontua.

6/ Elizaren estiloa aldatu - Munduarekiko harreman urruna, batzuetan harroegia, alde batera utzi, eta gaurko mendeari doakion bizi-estilo bat bideratu, bere zortearen kide girela agertuz. Berriz ere gizakiaren zerbitzari izan bere ahultasun eta duintasun hunkiezinean.

7/ Gizartearekiko elkarrizketa indartu - gure indar guziz elkarlanean arizanez justizia eta anaitasuna bideratu nahian ahaleginetan ari den gizarte sekularrarekin, neholako aitatasunanik bilatu gabe edo goratik begiratu gabe. "Ez dugu legegile gisa agertu behar, baina bai profeta gisa" (Paolo Dall 'Oglio aita jesuitaren hitza, 2013an Sirian desagertua).

8/ Egia egin, konfiantza berreskuratzeko - Elizak usuegi ukatu du gertakarien hedadura. Komunikabideen erasotzat hartu ditu gauzak. Kontua da egia egitea, egia osoa belztasun ozeano horri buruz, molde independente, deliberatu, engaiatu eta tematsuan. Horrek erran nahi du hobendunak zein diren zorrozki izendatu eta pisatu behar direla. Hori zor zaiote herenegungo, atzoko eta gaurko biktimeri.

9/ Apezak gai afektiboeri buruz hezi - Ordinazionearen edo erlijio-aitormenaren ondoko lehen hamar urteak hurbilagotik lagundu behar dira. Zelibatoaren gaia berriz aztertu behar da, eta funtsezko ahultasun afektiboak dituzten hautagaiak baztertu behar dira.

10/ Buru-gailentasun fenomenoei kontra egin - Gaintasun sexuala menpekotasun izpiritual batean oinarritzen da, botere-abusu batean. Horren kontra da, hain zuzen ere, deliberatuki borrokatu behar: Elizan, aginpidearen erabilpena berak sortzen duen askatasunaren bahean pasatu behar.

11/ Elizaren barneko boterearen erabilpena berrikusi - Elizan usuegi dira arduradunak aldi berean epaile eta kide. Ez dago hirugarren parte-hartzailerik. Maila guzietan, kontrabotereen auzia sortzen da, berdin autoritate independenteena. Eliza sinodala da sustatu behar dena.

12/ "Zero tolerantzia" aktetan ezarri - "Zero tolerantziak" aitzineko hamaika betebeharrak biltzen ditu. Abusatzaile oro gaztigatu beharko da zuzenbide kanonikoko prozedurei jarraituz, eta agintari zibilen esku utzi beharko da epaitua eta gaztigatua izan dadin. Paraleloki, kaltegileen artatze lan erraldoi bat egiteko gelditzen da, profesionalekin lotura hertsian.

"Lanak" gisa hortan planteaturik, galdera gelditzen da hauen obratzearena (Véronique Margron-ek aipatzen ez duena). Nola jokatu? Pertsonalki, ez dut nehondik ere uste aldaketa hori gaur egungo instituzioak bultzatu dezakeenik, hain zuzen ere berak baigaitu desastre horretara eraman. Etsenplua eta esperantza, niretzat, Alemaniako bide sinodaletik dator, emazteek artoski "bultzatua"...