“Topa”

Maiatzaren 27an, Gaztelu zahar frontoian Kuka konpainiak "Topa" ikusgarria emanen du, ordua ez da finkatua, bakarrik gauean izanen dela errana da.

Ikusgarriaren mamia “Lau gazte plaza batean aurkitzen dira. Gure herrietako edozein plaza izan daiteke. Musika entzun orduko, gazteak dantzan hasten dira, egunerokoa da beraientzat. Haien adierazpen forma da. Batzuk euskal dantza tradizionalean trebatutako dantzariak dira, beste batzuk hip hop dantzariak. Plazak, haien biziguneak, elkartzen ditu”.

Robot garbitzailea portuan

Herriak, portuan, ur gaineko hondakinen biltzeko robota lehen aldiz martxan jarri du, Itsas Oporlekuaren bulegoen ondoan. Hainbat hilabetez ur gaineko hondakinen arazoa duten beste portuekin solastatu ondoan, herriak DPOL deitu robota hautatu du. Portuentzat egokitua den kutsadura garbitze sistema autonomo hori, hondakinen eta mikro-hondakinen egiazko hurrupatzailea da. Korronteek eramaiten dituzten zikinak, autonomoa den robota horrek, gau eta egun xurgatzen ditu. Alde batetik bestera eramana izaiteko arina izanez, nunahi pausatzen ahal da, plastikozko zakuak edo(ta) zigarreta muturrak bezalako hondakinak metatzen diren lekuetan.