Heldu den urtean, Olinpiar-Joko lehiaketa famatuak Parisen hasi aitzin, gaitzeko su ederra, zoin-gehiagoka horien ezagungarri nolazpait, ibiliko da herriz-herri bi hilabetez segidan edo xuxenago erraiteko 68 egunez. Joan den egunean, jakinarazia izan da noiz nundik iraganen den. Alimaleko itzulia egitekoa du gisa guziz! Zure herritik jin dadien behar duzu haatik pagatu eta frango dirualde pizkorra galdetzen dute. Agertzen dira ikusmolde desberdinak. Badira pagatze horren alde, alde batetik emaiten dena bestetik irabazten dela aise eta aise! Pagatzearen kontrakoak ez dira batere hortarik ari! Dena den, Euskal-Herrira ere jitekoa da su famatu hori. Kostaldean ikusiko da, Hazparnen ere ba!

Egun hauetan, Olinpiar-Joko horiek baino gehiago aipu da haatik txirrindularien Frantziako itzulia. Aurten bestenaz ere gastatuak gira eskualde hortarik. Bilbotik abiatzen da alabainan eta hiru egunez segidan Euskal-Herrian gaindi ibiliko da. Astelehenean heltzeko Baionara. Egun hortan, txirrindulari horien pasabidea zerratua izanen da. Beste bide askotan ere ez da aise ibiltzen ahalko. Holako neurriak hartuak baitira ez da segur harritzeko, gisa hortako mugimendua izaiten baita. Horiek hola,gero eta gehiago, itzuli hori "Turra" deitzen dute hor gaindi, Hegoaldean frantsesetik hartu hitz bat frango berrixkoa. Denik ere "o" hizkia bederen kendu balute, Turra idatziz, bainan "o" hori atxikiz kolorerik ez duen izen bat berexi dute! Nik segurik ez daukat batere egokia! Beste gauza bat, eta hau baikorra zinez, euskarari toki ederra eginen diote txirrindulariak Euskal-Herrian izanen diren denbora guzian, hori berri ona, biziki ona! Denek ikus dezaten eta entzun ere, Euskal-Herrian girela...

Eztabaida bat berriz piztu da, kasik batere funtsik gabe, aspaldian ere aipu dena han-hemenka segurik! Su pizle aldi huntan, Edouard Philippe gobernuburu ohia. Arras berotua, ez dela hola segitzen ahal! Gaia hauxe da, ikastegietan udako oporraldiak behar litazkeela laburtu. Nahiz herrialde zonbaitetan, hala nola Italian eta Espainian, oraino luzeagoak ere diren. Baizik-eta udan bero handiak badirela noiznahi eta ez hain aro beraz eskolan egoiteko. Uda guziko oporraldiak kondutan hartuz Frantzia da haatik deneri nagusi, oporraldiek hamasei aste iraunez. Iduriz, ikerketa batzuk hori dute salatzen, gehiengo bat balitakeela laburtze on baten alde. Bainan ikusmolde desberdinak laster agertzen dira finkatu nahi bada oporraldi horieri zonbat egun behar litazkeen kendu, eta noiz.

Batzuk oporraldien sail guzia nahi lukete aldatu, hasian hasi hori litakeela egokiena. Beste frango uzkur, edo uzkur baino uzkurrago ere, sobera aldaketarekin gauzak ez direla nahasiko...