Beztimendu feria

Maiatzaren 20an iragan da, nola denbora dudakora zen, Lur Berri gelan egin da. Dena ongi betea zen, 35 saltzaile baziren eta denak izigarri kontent, zeren sekulako jendea ibili baita, kanpoan ere haurrentzat jostagailuak baziren. Christine Urbistondo, hori baitzen buru, izigarri kontent agertu da, deneri eskerrak ematen ditu. Horra egun baliosa izan da “Goxo Leku” taldearentzat.

Mus txapelketa

Maiatzaren 27an, larunbatarekin, Kafia ostatuak txapelketa antolatzen du, egun guzian. Gosaritik hasiko da (9:00), multzuka antolatu partidak hasteko, bazkaldu eta, partidek segituko dute. Izen ematean ordaindu beharko da, gosari eta bazkari 40€ bakotxarentzat, bazkaria bakarrik 25€. Izena emateko deitu 06-20-61-39-17.

Beti Gazte

Errearoaren 17an, larunbatez, elkarteak antolatzen du aurtengo bigarren elgarretaratzea, San Inazioko “Les Trois Fontaines” jatetxean (12:30). Bazkariaren menua: kir, eltzekaria, legatza onddo saltsarekin, errakia baratzekariekin, ardi gasna erreximentarekin, bixkotxa, arno beltza eta gorria, kafea ondokoarekin, prezioa 38€, bainan 33€ karta dutenentzat. Zuen izenak eman berantenez errearoaren 13a aitzin, deituz: Etcheverrigaray Jeannot 05-59-54-21-34, Imaz Maite 06-31-62-90-66 edo Bats Anita 06-28-28-08-24. Erretretatu guziek elgarrekin egun goxo baten pasatzera gomitatuak zirezte. Aitzinetik bulegoak denak eskertzen ditu.

Pilota

Esku-huska errebotean - Lehen mailan: Curruchaga Betti- Calvet Daniel irabazle 30-25 Amikuzeren kontra. 3. mailan: Iribarren Iñaki-Fagoaga Eneko galtzaile 30-17 Zaharrer Segiren kontra. Iribarren Oihan-Sarie Bastien irabazle 30-9 Irisartarrak-en kontra. Arribillaga Eneko-Mendionde Peio irabazle 30-00 Hardoytarren kontra. Iribarren Oihan-Elizalde Lauran irabazle 30-05 Hardoytarren kontra. Gaztetxoak: Aguirre Arkaitz-Semerena Eneko galtzaile 30-13 Zaharrer Segiren kontra. Alduntzin Kaiet-Berasategui Unai irabazle 30-9 Mauleren kontra. Vella Barneix Mani-Marin Imaz Eneko irabazle 30-00 Mauleren kontra. Idoate Uhaitz-Herredia Unai galtzaile 30-27 Inthalatz-en kontra. Kimuak: Lafitte Unai-Idoate Xan galtzaile 30-27 Urruñarrak-en kontra. Umetxoak: Babace Leizagoien Oihan-Zabaletz Orhi irabazle 15-10 Itsasuarrak-en kontra. Odeau Martinez Iban-Sanjurjo Behoteguy Jon irabazle 15-12 Eskulariren kontra, Lagrenade Jokin-Lopes Kepa irabazle 15-9 Eskulariren kontra.

Palantxa trinketean - Neskak 2. maila: Jauregui Maia-Blanco Oihana galtzaile 40-36 Ahurtiren kontra. Gazteak: Mounho Maika-Sansinena Elena irabazle Senpereren kontra.