Parropian aldaketak

Gracia Ndongala-Madiadia apeza ekain hondarrean joan zaigu oporretara bere herrialdera, Kongorat, bi hilabeterentzat. Togoko Paul apezak ordainduko du udan. Agorril hondarrean itzuliko da Gracia apeza bi asterentzat eta jakin dugunaz, ondotik Biarnoko Monein aldean izendatua omen da. Ondorioz, apezak xuhurtzen ari-eta, Garaziko San Frantses Xabier parropiari juntatuko da Baigurako Jondoni Jakobe gure parropia. Garazi aldera izendatua izan den François-Régis Jasnot apeza (euskaldun berria, amatxi xiberotarra, sortzez aldiz Charente-Maritime eskualdekoa) da berezikiago arduratuko hemengo parropiaz, laguntzaile ukanen duela Joseph Nguyen apez vietnamdarra, orain arte Olorone aldean zagona. François-Régis Jasnot-ek Donibane Garazi eta Donazaharre aldean apez nagusi dagon Dominique Cornu hazpandarra ordainduko du, hau Uztaritzeko serora beltxen (Filles de la Croix) eta Kanboko serora frantziskanoen omonier izendatua baita.

Herriko bestak

Huna egitaraua. Ortzegun 13an, (19:00) idekitzea Azkena Bideko txarangarekin, (20:00) zikiro jatea, Gaubele taldeak alaiturik, ondotikako dantzaldia ere hunek segurtaturik. Ostiral 14an, kantaldia elizan (17:00) Airostak, Berçaits anaiak eta Hiruri taldeekin; (19:00) mutxikoak Saltokarekin eta talo eta xingar; (21:00) Basapiztiak taldearen kontzertua; (23:00) DJ Papetetxart. Larunbat 15ean, (15:30) 10-15 urtekoen lasterkaldia (3km), (16:00) Pontx pailazoaren ikusgarria, (17:00) haurren krakada eta ping-pong lehiaketa binaka, (19:30) talo eta xingar, (21:00) Esne Beltza eta Dupla taldeen kontzertuak, ondotik dantzaldia Garilak 26 taldearekin. Igande 16an, (10:30) meza nagusia, (12:00) aperitifa Herriko Etxeak eskainirik, ondotik muskuilu-fritak herritarrentzat, (17:00) pilota partidak Frantziako xapelgoaren kondu, (19:30) talo eta xingar, ondotik DJ Papetetxart. Besta on orori.