Herriko Etxea Lapurdin

Urte luzetan Lapurdi zentroa deitzen ginuena Herriko Etxe bilakatu da, berritze obrak bukaturik, kanpo tinda lan batzu aparte. Ekainaren azken bi egunetan egin dira aldairak. Landagoien, Gaztelondo eta Mailiarenean banatuak ziren zerbitzu guziak orain toki berean elgarretaratuak dira. Joan den ortzegun arratsaldean auzapezak dena bisitarazi du, hautetsieri eta prentsa kideeri. Beraz badira 25 bat bulego argiak eta ongi hornituak, hiru biltzar gela (neurri desberdinekoak), jateko gela bat egokia eta artxibategi bat oso modernoa. Agian denentzat lanak errextuak izanen dira.

Kontseiluko biltzarra

Bisita bukatu bezain laster, iragan da oporrak aitzin egin den azkena, gela berrian. Huna aho batez onartuak izan diren gaiak:

- Haur eta nerabeen harreraren tarifen onartzea.

- Eskolaldiaren harreraren tarifen onartzea.

- Eskola jantokiaren prezioak finkatzea (2023-2026).

- AR 580 lur zatian aterbetxo baten eraikuntzarako baimenaren onartzea.

- Arkia atekamotzan bide zola azkartzeko ''Essor Txoritegiak'' sozietateak proposatzen duen diru laguntza onartzea (6.194 euro).

- 2023ko sei elkarteri ez ohizko diru laguntza ekartzea.

- Errobi herriarteko bizikleten eskema nagusiarentzat diru laguntzaren galdea.

- AFMR Etcharry - ADL - ANAMACAP - CELESTE erakundeeri alokairu kontratuen gehigarriak onartzea.

- Euskal Elkargoko eskuaz aldatu karguen txostenen onartzea.

- 2023ko herriko zerbitzuen prezioak finkatzea.

- Heraitzen bide izendatzea: Gaineko Landak atekamotza.

Bi gaiek dituzte bozketan abstentzio batzu hartu:

- Herria astekariari Landagoienerako alokairu kontratua finkatzea (2 abstentzio Uztaritze Sentsu Ona).

- Mediateka baten sortzeko merkatu egitaraua eta abiatze ageriaren onartzea (4 abstentzio ezker aldea).

Hurrengo kontseiluaren eguna ez da finkatu.

Estreinaldi

Goiz edo berant obrek behar zuten bururatu, oraikoan eginak dira. Hogoi urte pasa hasirik, geldialdi askorekin, 932 Departamenduko bide nagusian Heraitze eta Planuya arteko zatia lau lerrotan emaiteko obrak bukatuak dira. Orain lasaiago ibiliko dira egunero hor dabiltzan 20.000 auto eta kamioiak, nahiz gero Baionara hurbiltzean orain arteko kezkak beti izanen diren. Joan den ortzirale arratsaldean Arruntzako zubiaren gainetik bide zati hori estreinatua izan da. Bertara etorriak ziren J. Jacques Lasserre Departamendu kontseiluko lehendakaria, Philippe Etcheverria eta Bénédicte Luberriaga kantonamenduko kontseilari bikotea, beste zonbait kontseilari, auzapez eta obra hortan parte hartu duten enpresaburu. Azpimarratzekoa ere Beñat Auroy Uztaritzeko kontseilari ohiaren presentzia, Lasserre jaunak ohoratu duena, bere garaian asko lan egin baitzuen bide zati horrentzat. Geldialdien ondotik, 2017an, lanak berriz bultzatu dira. Arruntzako eta Astobizkarrerateko zubiak berriz eraikirik, orotara obra osoa 15,5 milioi euro gosta da. Bere mintzaldian Lasserre jaunak justifikatu ditu geldialdiak, adieraziz departamenduak bere gain 4.500 kilometro bide dituela. Eskertuak izan dira partaide guziak, hautetsi, enpresaburu, langile eta arduradun, berandu badu ere obra ederra baita eta pozik gelditzekoa. Irriño batekin Bruno Carrere auzapezak oroitarazi dio orain behar lukeela gogoetan hasi Uztaritze inguratuko duen proiektuaz. Geroak erranen. Hurrupaldi batekin ekitaldia bukatu da.

Santa Madalena beila

Urtero bezala uztailaren 22an Santa Madalena izanez, beilaren meza emanen da Otsanzko kaperan (18:00). Ondorioz larunbat arratseko meza Uztaritzeko elizan kendua izanen da. Beilara oinez joan nahi dutenentzat hitzordua emana da Jondoni Bixintxo eliza aitzinean (14:30). Oinezko ibilaldia errexa da bi oren inguru hartuko dituena.

Pilotako finalak

Euskal Herriko pilota batzordeak bere xapelgoen finalerako egun osoa antolatzen du, Uztaritzen, Bilgune plazan, uztailaren 22an, larunbatarekin. Partida guziak atxiki-ttipian izanen dira, 8 orotara, goizean hasiz (10:00). Heldu den astean egitarau argiagoa. Atxiki ttipia maite duen pilotazaleak jakinen du eguna nun pasa, agian aroa alde izanen da.