1944ko ekainean, gaitzeko erasoa akuilatuz, zernahi soldadu, amerikano, ingeles eta beste, oldarrean etorri ziren itsasoz Normandiako hondartzetara, alemanak behar zituztela azkenean alde bat haizatu. Frantsesak ere baziren heien artean. Ez hainbeste bainan 177 halere. Batto bazen oraino bizi, Léon Gautier, bretoina sortzez. Heldu den urrian bete beharrak zituen 101 urte. Joan den egunean pausatu da Caen hiriko artategi batean. Goresmen beroenak eskainiak izan zaizkio. Berak zioen deus arrarorik ez zuela egin, bere eginbidea zuela bete eta besterik ez. Azpimarratua izan da halere, eta arrazoinekin, mereximendu handiak bazituela.

Zenatur-bozak beharrak dira heldu den irailean, ez denetan bainan departamendu frangotan, gurea barne. Apailu frango bada beraz jadanik eta joan den egunean jakin da ezkerraldekoek ez dutela bat eginen, NUPES delakoaren kondu, askotan erakustera emana zuten bezala. Intsumitu delakoek diote sozialisten falta dela ez baldin badira akomeatu. Sozialistek errefera intsumituak direla sobera gormantak agertu. Dena den, batasun horren eskasean, jokoa arrunt bestelakatua ditake. Ezkertiarrek tanto anitz galtzen ahal, aulki parrasta bat ere berdin.

Bulta huntan, gero eta gehiago aipu dira eskualde gehienetan etxe anitzek jasaiten dituzten kalteak,arraildurak ba beren murruetan. Batzuetan, etxe guzia lehertzeraino! Iduriz, kasu frangotan, klima aldaketak egiten duke hori eta ikerle askoren ustez segurik gauzak gero eta makurrago joan ditazke ondoko urtetan, Beste arrazoin bat ere bada haatik. Etxeen zimenduak sobera ahulak eta beti ahultzen ari. Eraikinak gisa hortako tokietan izanki. Sobera buztintsuak diren leku batzuetan. Untsa gogoetagarri ere baita. Ikerle askok diote gisa hortako makurrak gero eta gehiago izanen direla nunahi, Pariseko aldean gehienik naski, bainan beste eskualdetan ere! Gastu handiak batzu eta besteentzat, ez baita erretx finkatzea nork beharko dituen horiek denak pagatu! Arrangura handiak nahitez asurantza etxeentzat. Hoinbeste xahutzerekin, nola behar duten iharduki asurantza-sariak sobera emendatu gabe, jadanik ere arras gora direnak.

MEDEF erakundeak elgarretaratzen du zernahi enpresaburu. Joan den egunean bost urterentzat hautetsi dute beren burulehen bezala Patrick Martin, Ain departamendukoa dena. Bere enpresan berean baditu kasik hiru mila langile. Orain, erran ditake nagusien nagusi jartzen dela nolazpait.Familia Frantzia guziko aberatsenetarik batto izan behar da.