Argazki-oina:

Ezkerreko argazkian, Peter 'Pedro' Mendiolea 'North Queensland Basque Club'eko lehendakaria jendeari mintzo.

Eskuinekoan, elgarretaratzeko lau irudi, zerbitzari, partaide, familia eta dantzariak (argazkiak NQBC)

---------------------

TOWNSVILLE, AUSTRALIA. Hogei urte bete, eta ederki asko ospatu zuen uztailaren 2an, igandea, Townsville hiriko udal parke baten erdian, Udalak utzirik, duen egoitza dotorean, arbolez eta berdegune batez inguraturik. Berrehun eta hamabost pertsonek hartu zuten parte egun osoko ospakizunean, "heietarik 171 helduak, 29 ikasle eta nerabeak, eta beste 15 umeak" zirela, elkarteko lehendakari Peter 'Pedro' Mendioleak HERRIAri hala adierazirik. Hiruzpalau belaunaldi bildu ziren, gehientsuenak Australian sortu euskal arrazakoak, Euskal Herrian sortu adineko emigrante batzuk, eta baita Euskal Etxeko bazkideen lagun batzuk ere. Bertan zen zaharrena, 96 urteko Felisa Azpiri zen, muxikarra (Bizkaia) eta gazteena, 10 bat eguneko Storm izeneko neskato txikia, ama, gernikar jatorriko Erika, eta aita Maakirekin bertaratua, Townsvillera aldatu berriak.

Townsvilleko andere auzapez Jenny Hill ere bildu zen, eta Pedro Mendioleak egin bezala, bertaraturikoeri zuzendu zitzaien, eskerrak eta zorionak emanez "euskal elkarteak egiten duen lanagatik Australiaren identitate multikulturala atxikitzen". Ohorezko aurreskua ere dantzatu zuen Ainara dantzari gazteak, eta Ainarak berak trebatu neskato eta ume talde batek Zazpi Jauzi eta Donostiako Danborrada dantzatu zuten, AEBko Boiseko moldean. Besta osoa eta baita janaria ere EEko kideek prestatu eta zerbitzatu zuten.

Arratsaldez, eta Sanfermin egunetan girenez, 'Running of the bulls' edo entzierro jolas bat obratu zuten haurrentzat. Txinga-proba ere egin zuten, Maaki Onekawa À¢'€'"Storm-en aitaÀ¢'€'" txapeldun. Euskal erakusketa bat ere muntatu zen eraikinaren barnean, familia euskaldunek eman tresna eta objektuekin. Zorionak, eta beste 20 urtez, Townsvilleko euskaldunak!