Frantses estatuak, urte hondarrean, "Etxebizitzaren alde engaiatu lurraldeak" deitu operazioa martxan jarri du. Etxebizitzen ekoizpena bultzatzeko, Elisabeth Bornek, orduko lehen ministroak, azaroan deklaratu zuen estatuak etxebizitzaren merkatuaren zailtasunaren aitzinean, "Etxebizitzarekin engaiatu lurraldeetan" deitu proiektu deialdia martxan jarriko zuela. Hori abiatzeko, gobernamenduak diru laguntzak hitzeman ditu. Datozen hiru urteetan, eskualdetako elkargoen beharren arabera, 30.000 egoitza ateratzeko helburua du. Beste eskualde anitz bezala, Euskal Elkargoak deialdian hautagaitza pausatu du.

Etxebizitza ministerioaren zirkularrean agertzen da, laguntza hori eskuratzeko bizitegi tentsio handian diren eremuek dutela baliatzen ahalko. Horretarako Euskal Elkargoak pausatu hautagaitza, proiektu deialdiaren baldintzetan sartzen da.

Egitasmo hunen helburua 2027rako egoitzen antolaketa bizkortzea, eremu institutu bakoitzarentzat 1.500 etxebizitza inguru eraikitzeko xedea da, horietatik %25a gutienez etxebizitza sozialak izanez. Testuak zehazten du: "Batez ere tentsio inmobiliario handia duten sektoreetan, geltoki-eremuetan edo eskala handiko proiektu ekonomikoa garatzen diren eremuetan kokatuko dira lagundu eragiketak". Hiri batzuetan industria gune berriak plantatzen dira, ondorioz heldu diren langileek ezin dute aterpe bat atzeman.

Balizko dirulaguntza horiek baldintzak badituzte, hiri-kalitate eta ingurumen kriterioak betetzea eta etxebizitzen prezioen kontrola menperatzea beharrezkoa da.

Salbuespenezko diru laguntzak ere emaiten ahalko dira, inflazio testuinguru huntan defizit ekonomikoa betetzeko, higiezinen kargen transferentzian deskontua aplikatzeko edo lehen mailako azpiegiturak finantzatzen laguntzeko. Dirulaguntza hauek etxebizitza ekoizpenaren egutegia eta helburuak betetzearen baldintzapean dira, hirigintza eta ingurumen kalitate irizpideak, bai eta etxebizitza gehienen prezioak kontrolatzeko engaiamendua hartu behar da. Departamenduetako prefetak deialdiaz eta hautagaitzaz arduratzen dira. Hautatuak diren herriak edo(ta) elkargoak estatuarekin hitzarmena izenpetuko dute.

Euskal Elkargoa "Etxebizitzarekin engaiatu lurraldeak" sailkapenerako hautagai da. Hautatua bada, 3.000 etxebizitza finantzatzen lagunduko luke, horietan 2.053 egoitza sozialak (%58,6). Guzira, elkargoak 24 milioi euro ukaitea espero du.

Euskal Elkargoak "gune anitzeko" aplikazioa sortu du. Aurkeztu dosierrak 24 proiektu biltzen ditu, SRU legeak jada urbanizatu espazioak zentzuz dentsifikatzea du helburu, hiri hedadura saihesteko. Lege horren pean Ipar Euskal Herriko 11 herri dira: Baiona, Angelu, Miarritze, Bokale, Bidarte, Donibane Lohizune, Azkaine, Urruña, Hendaia, Senpere eta Mugerre.

Elkargoak dispositibo horren bidez egoitzen %60a alokairura bideratuko luke (1.200 baino gehiago). Horietan "biziki sozialak" deitu 435 barne, prekarietatean bizi direnentzat erreserbatuak. Bestalde 200 egoitza ikasleentzat eraikiak izanen dira, ministerioak ezarri irizpidetan, hautagaitzak "publiko espezifikoak" kontutan hartu behar ditu.

Laster jakinen da Euskal Elkargoaren hautagaitza onartua izan denez.