Ihauteriak

Joan den larunbatean herriko plazan beharrak zirenak, aro euritsuarengatik, barnean iragan dira.

Jendalde gaitza bildurik, herriko gela handian ihauteri giro beroa izan da bizpahiru orenez.

Arberoa ikastolako haurrekin abiatu zen pesta. Antzerki, kantu eta dantzaz osatua den "Hartzaro Ttipi" ikusgarria biziki polliki eman zuten, publikoarekin batean berak ere loriatuak zirela erakutsiz.

Ondotik Arberoako joaldunek bazterrak harrotu dituzte. Arberoako txarangarekin euskal jauziak emanez, janari eta edariak gozatuz, giro sanoan bururatu zen aurtengo ihauteria.

Eskerrak herriko besta batzordeko gazteeri, Artetxea elkarteari, parte hartu duen Arberoa ikastolari ihauteriaren ohidura berpizturik herrian.

Mintzaldi eztabaida

Otsailaren 17an (10:00) larunbat goizez beharra da, Izturitzeko "On egin" jantegian. Aurelien Berlan filosofoa eta baratzezaina, 10 urte hauetan Tarn eskualdean jabetza kolektiboan bizi dena izanen da hizlaria.

Berak gogoetatu dituen jabetza pribatuaz bestelako hautuez mintzatuko da.

Badu zenbait urte lur eta etxebizitzen espekulazioaren borrokak Euskal Herrian hedatzen ari direla.

Baliatzaile zenbaitek denak berenganatuz, beste batzueri bizitegi baten ukaiteko ahala kentzen edo dudan ezartzen diete.

Aterabide zuzenagoak atzeman behar litezkeela ezin uka. Mintzaldi eztabaida garrantzitsu hau hortaz gogoetatzeko antolatua da.