Argazkia SAN NICOLAS. Hego Amerikan Etxepare Institutuaren 'Euskara Munduan' programaren baitan euskara irakasle bihurtzeko ikasketa-prozesua abiatu duen talde berria: Adriana Irrazabal, Agustina Madarieta, Aimé Barrutia, Aldana Arruabarrena, Andrea Malcorra, Diego Orellana, Elián Mancini, Eliana Domench, Felipe Fuentes, Ignacio Esquiroz, María del Mar Alderete, Mariana Juez, Mónica Olasaguirre, Sol Cicero eta Renzo Villanueva. Argazkian heien irakasle Anabel Jaureguiberry, Cecilia Canz, Gabriela Mendia eta Kinku Zinkunegirekin. Biba ziek!

---------------

SAN FRANTZISKO. Joan den astean aipatu genuen -eta oraikoan xehetasun handiagoz ekarriko dugu hunara- heldu den asteburuan, otsailaren 17 eta 18an, San Frantziskoko Gure Euskal Etxeak bere 42. urtebetetzea ospatzeko eginen duen besta eta elgarretaratzea. Ohi bezala, ehundaka jende bilduko dira San Frantzisko eta Kalifornia osotik helduak, baita Estatu Batuetako beste hainbat lekuetatik ere, NABO federazioak bere neguko bilkura hor eginen baitu ebiakoitzean. Pilotari gizon eta emazte gazteak ere etorriko dira Euskal Herritik, eta aurkezpenak, emanaldiak, filmak, musika, kantuak, dantzak, meza, omenaldiak eta moxkor salda ere baitaratuko ditu programak, jarduerez beteriko asteburuan.

Larunbat goizean, urteko lehen bilkura eginen du Jean Flesher lehendakari duen NABO euskal etxeen federazioak. Ondotik, Kalifornia eta San Frantziskon ere grabatu zen 'Txipli, txapla pum, Amerikatik' filma emanen dute, BEO elkarte euskaltzalearen eskutik. Segidan, Pedro Oiarzabal ikertzaile eta historialariak, 2. Mundu Gerlan parte hartu zuten euskal amerikar soldadueri buruz 'Sancho de Beurko Elkartea' egiten ari den ikerkuntza aurkeztuko du, baita euskaldun haueri (1.600etik goiti), heien izen-deiturekin, Estatu Batuetan monumentu bat eraikitzeko NABOk abiatu berria duen kanpaina ere. Ondoren, joko garbi, pilota paleta eta esku huskako partidak EEko kantxan.

Pilotari arituko dira Euskal Herritik etorririk, Eneko Sarratia, Pantxo Lissar, Iban Riouspeyrous, Ximun Etcheverry, Thomas Galharrague eta entrenatzaile Éric Migueltorena (joko garbi); Maider Mendizabal, Amaia Irazustabarrena, Maider Huici eta entrenatzaile Naia Ouro (pilota paleta); Beñat Azketa, Iban Matxinandiarena, Ander Murua, Beñat Garmendia eta entrenatzaile Lur Ziarrusta (esku huska), Euskadiko Euskal Pilota Federakuntza laguntzaile. Aperitifa eta BBQ afariaren ondotik, bala edo erromeria, 'Amerikanuak' taldearen musika eta erritmo euskal-amerikarrekin.

Igandean, euskal meza, zuzenean online emanen dena (https://www.youtube.com/watch?v=IHbDScpRqxo), San Frantzisko bereko Elgarrekin korala, Zazpiak Bat-en klika eta dantzariak, eta dantzari Gazteak-ekin. Hauek ere segidako Omenaldi eta Bizi Emankorra sari-ematean hartuko dute parte, ohoratuak Roland Cherbero, Frantxoa Camou eta Jean-Michel Duhalde izanik. Ondoren aperitifa, bildoski bazkaria eta arratsaldean, ebiakoitzean bezala, joko garbi, pilota paleta eta esku huskako partidak, azkenik eguna Amerikanuak taldearen musika eta dantzarekin eta geroago 'moxkor salda' oro-osatzaile batekin bururatzeko. Zorionak antolatzaileeri, ontsa ospatu partaide guziek San Frantziskoko Gure Euskal Etxearen, 42. urtebetetzea!