Besta alternatiboak

Baionako besten kari, hiriko elkarte anitzek besta alternatiboak antolatzen dituzte, gehienak Baiona Ttipia auzoan iragaiten dira, ahantzi gabe Gaztelu Zaharraren harresiaren itzalpean euskal elkarteek antolatu Karrikaldia.

Aitzineko astean Baionako Gazte Asanbladak Patxa plazan iraganen diren animazio eta kontzertuen berri eman du. Egin den aurkezpenean kolektiboko kideek adierazi dute: "Azken denbora hauetan jasan ditugun Baionako besten lerratzeengatik eta bereziki azken urtean gertatu ezbeharragatik, Baionako eragile ezberdinekin 2032 kolektiboa osatu dugu". Kolektiboak urte osoan zehar, Herriko Etxearekin negoziazioetan ibili da, bestak jasangarriagoak izaiteko 10 proposamen egin ditu onartuak eta aplikatuak izan daitezen. Errana izan da: "Aurtendanik lorpen batzuk gauzatuko ditugu, baina aurrerapauso tipiak dira". Bilduak zirenek salatu nahi ukan dute ere besten kari euskarak ez duela merezi duen lekua ukanen.

Bestalde Patxa plaza besta gune izanen da, kontzertuak entzungai izanen dira. Beste toki batzuetan ere animazioak antolatuak dira: Züzülü ostatuan (Cordeliers karrika), Patxokin eta Biltxokon.

Euskal kulturak ere bere lekua ukanen du, Jacques Porte plazan arrastirietan (16:30-23:00), Karrikaldia deitu ekimenean programazio aberatsa eskainia izanen baita. Gune horretan, eguerditik harat ikastolek jateko eta edateko proposatuko dute.

Lehiaketak ere iraganen dira, horietan famatua den arroltze moletarena, asteazkenean iraganen dena (9:30-12:30).

Uda ikastaroak

Hizkuntza baten transmisioari eta erabilerari buruz, inkesta soziolinguistikoak ezinbesteko tresnak dira hizkuntza politiken eraginkortasuna neurtzeko. Uztailaren 15ean eta 16an Arteen Hirian, bi gaien inguruan egun osoan bi aldetako unibertsitateko erakasleek, soziologoek, formatzaileek eta euskalgintzako eragile desberdinek beren iritzia emanen dute.

Uztailaren 15ean "Hizkuntza Politika berrirako urratsak Ipar Euskal Herrian" gaiaren inguruan mintzatuko dira (10:00-17:00). Uztailaren 16an (9:00-16:30) "Hizkuntzen erabilera eta ikasketa hizkuntza gutituekin bizikidetzan: inklusiorako mugarriak" deitu gaiaren inguruan solastatuko dira.