Xapeldun!

Joan den larunbatean, Bidarraiko plazan jokatu dira Euskal Herriko gazteen finalak esku-huska. Abarratia pilota elkarteko ekipa baginuen finala jokatzen zuena, gaztetxoetan. Hor ari ziren Teo Etcheverry eta Mikel Harguindeguy. Orain arte jadanik trinketeko xapela eskuratua baldin bazuten, aldi huntan plaza laxokoa jokatzen zuten Ñapurrak-eko bikotearen kontra (Gilen Doyhenard eta Iban Etcheverry). Gure gaztetxoek partida frango gaizki hasi dute, zeren eta 8/1 galtzen zuten. Halere pundu bakotxari lotu dira eta emeki emeki beren beranta berriz harrapatu dute, berdintzeko partida erditsutan 15 pundurekin. Partidaren bigarren partea, gure pilotarien alde izan da, gogortu dute jokoa eta ziloa egin dute 30/25 nagusitzeko. Erran behar da ezpeletarrak ahulduak zirela, esku minberatsuekin. Horrek ez du deus kentzen gure gazteen eta trebatzailearen pozari. Biba zuek gazteak eta segi hola ondoko astetan Frantziako xapelketan!

Mendi lasterketa

Entzun dukezue zoinbait egun barne Parisen Olinpiar Jokoak jokatu beharrak direla. Kirolari bat ez duena parte hartuko bainan merezimendu bera duena dugu Jérome Errecart herritarra, Idioineko semea. Badu zoinbait urte orain hunek laster egiten duela goi mailan, izan bideetan edo mendietan. Azken aste hauetan, Azpeitian jokatu du 65 kilometroko lasterketa mendietan. Joan den martxoan, Bartzelonan izan den 42 kilometroko maratoian parte hartu du, 3 orenez petik. 600. bururatu du jakinez 20.000 lasterkari bazirela!

Duela hilabete bat, Italian izan da, Dolomites mendietan gaindi 120 kilometroko lasterkan. Horiek denak izan dira bere sasoiko lasterka nagusiaren prestatzeko. Hau iraganen da agorrilaren 30ean, Chamonix-eko eskualdeko "Ultra trail du Mont Blanc" deitua. Distantzia 171 kilometrokoa ukanen du, Frantzia, Italia eta Suitzan gaindi ibiliz. Desnibelaren aldetik, 10.000 metrokoa izanen da Alpetan gaindi! Dena ontsa pasatuz, behar luke 30 oren pasatu, gau eta egunez lasterka gelditu gabe. Kuraia on Jérome prestakuntzarentzat eta plazer hartu!