BAIONA. Joan den ebiakoitzean, hondarreko urteetako usadioari jarraiki, Baionako bestekin bat, elgarretaratzea egin zen hiriko harresietan, aire zabalean, Frantziako Euskal Etxeetako kide multxo bat bildu eta elgarrekin bazkaldurik. Urte guziz aldatzen da hitzorduaren euskal etxe antolatzailea, eta aurten Paueko Lagunt eta Maitako lagunek egin zuten koordinazio lana, Henriette eta Mayalen-en lan ederraren eskutik. Bazkaria Hiriburuko Therry Laxaguek prestatua zuen, pintxoak, pontxea, antxoak, tortilla, ratatouille eta txistorra, besteak beste, Baionako xingarrarekin, legatza koxkera, euskal pastiza eta euskal ardi gasna, ardo eta ur sortañoa lagun. Frantziako zazpi euskal etxe bildu ziren, hala nola Pariseko Euskal Etxea, Bordeleko Eskualdunen Biltzarra, Tolosako Denak Bat, Lyon-eko Euskal Etxea, Montpellier-ko Eskualdunak, Marseillako Euskal Etxea eta Paueko Lagunt eta Maita. San Frantziskoko Euskal Etxea eta Nabo ere bertan ziren, Valerie, Joana eta Daniel Arrechearekin. Eusko Jaurlaritza, Herria eta EuskalKultura.eus ere han izan ziren. Kantuz ere: Agur Jaunak, Txoria Txori, Xalbadorren heriotzean... Jende giro ederra, baita aroa ere. Mila esker antolatzaile guzieri!

TRUJILLO, PERU. Euskal etxe gaztea da Trujillokoa, baina gogo handikoa, eta ikasteko eta zabaltzeko fier engaiatua. Wilfredo Lizarzaburu Velez du lehendakari eta sustatzaile nagusi. Ikasturte huntan, helduak dira Trujillora Euskal Herriko Unibertsitateko bost ikasle, bertako Cesar Vallejo Unibertsitatera, eta hunek aukera berriak ireki dizkio Euskal Etxeari, gazteek hala nahi badute lekukotasun emaile ederrak izaiten ahal baitira. Mementuko bildu, elgar pixka bat ezagutu eta lehenengo urratsetan dira lankidetza nola egin ikusten. Euskal Etxeko gehientsuenak, euskal arbaso urrunekoak dira, eta egarri dira zernahi jakiteko Euskal Herriaz, euskal kulturaz eta euskarari buruz. Gazteetarik hiru Gasteizkoak dira, Maider García Ruiz, Alaia Redondo Izaga eta Lidia Torre; beste bat nafartarra, Josu Rojano Goñi, eta Leire Belartieta Galardi gipuzkoarra. Badute Euskal Etxekoekin elgarren gosea. Hasteko gazteetako batek erran die astero joaiten ahal dela musean jokatu eta erakasteko. Gazteren bat ezagutzen baduzu atzerrian ikasten ari dena, aipatu kontaktatzeko bertako Euskal Etxea, baliosa izaten ahal baita bi parteendako!