Pilota

Joan den apirilaren 28an, Arrangoitzeko trinketean nesken palantxako finalak iragan dira. Gure tarroak, B mailan, Saioa Bidart/Lore Acheritogarayk finala jokatu dute eta 21-40 galdu Oztibartarrak-en parean. Aupa halere Saioa eta Lore hain xapelketa ederra eramanik!

Bestalde, trinketeko sasoinetik landa, gure esku-huskako pilotariek plaza laxoko bidea hartuko dute eta lehen partidak aste hondar huntan jokatuko dira. Irisartarrak pilota elkarteak, xitoetatik… 2. mailara arte, 10 pare engaiatu ditu. Hemen ere deneri suerte on!

Eskubaloia

Nazional 2 mailan, lehen taldeak berdin egin du Bègles-en, 28-28. Prenazional mailan bigarren taldeak galdu du, Mont de Marsanen, 29-25. Nesketan, nazional 3 mailan, Kanbo/Irisarrik ederki irabazi du Ribérac taldeari, 41-24. Bigarren taldeak Urruñan galdu du, 23-22. Erregional mailan, Kanbo/Irisarriko, hemezortzi urtez petikoek berdin egin dute, Asson-en, 27-27. Azken partida jokatu aitzin, Akitania Berriko xapeldunak dira. Bigarren sasoina segidan xapeldun direla, ez baita balentria txarra! Biba jokolariak eta entrenatzaileak!

Heldu den larunbateko partidak – Gizon helduetan, hirugarren taldeak Donapaleu errezebituko du (21:00). Frantziako xapelgoaren kontu, hemezortzi urtez petiko taldeak, Atharratzen ASPOM Bègles errezebituko du (19:00). Nesketan, nazional 3 mailan, Kanbo/Irisarri Riberac-era joanen da (19:30.

“Revenantes” antzerkia

Maiatzaren 17an (19:00) Prunelle Giordanok “Revenantes” antzerkia emanen du, Ospitalean. Bere obran, Prunelle Giordanok, XVII. mendeko Lapurdiko sorginkeria epaiketak berrikusten ditu, hiru emazteren bitartez. Hobe lekuak atxikitzea ospitalea.fr.