Euskal Argentinaren urteko biltzar nagusia Lekunberrin iragan da apirilaren 5ean. 65 kidek parte hartu dute biltzarrean eta ondotik Larrañeta ostatuan bazkaldu dira giroa kantu ederrez alaitzen zutela.

2024ko gertakariak eta konduak baieztatuak izan dira aho batez.

Aspaldiko kidea zen Georges Barneche zendu da Auch hirian eta omenaldi gisa Herria aldizkarian Argentinara egin bidaiaz eta hango familiaz berak idatzitako artikulu bat irakurtua izan da.

2024ko ekintzak aipatu dira, hala nola:

- Donapaleuko Touzaa etxean den bulegoa eta hilabeteko lehen ortzirale arratsaldez egiten den permanentzia. Argentinara edo Uruguaira joan diren familiako emigranteen bila dabiltzan jende frango etortzen da. Hortarako Aphezaren emaitzak eta Argentinako eta Uruguaiko kontsuladoetako emaitza guziak bilduak ditu Euskal Argentinak.

- Donapaleun apirilaren 12an eskaini den “Euskaldunak Australian” erakusketaeta Esther Cortak eman duen mintzaldi ederra.

- 2025eko urriz, Bideak-era etorri zen Argentinako Rosariotik “Kare” deitu musika eta kantari laukotea. Lehen partea “Le Chœur des Marins Adour Océan” taldeak alaitu du. Donapaleutik landa “Kare” taldea Hergarai aldera joan da han beste kantaldi baten eskaintzeko.

- Euskal Herriko Unibertsitateak eskaturik, Monika Legartok Bizkaiko Ispaster herrian eskaini du mintzaldia, gaia Iparraldeko emigrazioa zelarik. Beñat Zuburuk Hazparneko zapata egile eta larrugintzan ari ziren langileen emigrazioa aipatu du.

- 2024ko Miarritzeko film festibala Argentinari dedikatua zitzaion. Karia hortara mahai ingurua antolatua izan da euskal diasporari dedikatua zointan parte hartu duten Beñat Zuburu, Argitxu Camus Etxecopar, Xabier Zubillaga, Oscar Alvarez Gil eta Monika Legartok.

- 2024ko urrian, Iholdiko Zahar Etxeak gomitaturik, Monika Legartok euskal emigrazioaz mintzaldia eskaini du.

- 2024ko agorrilez, Donapaleun iragan den elkarteen elgarretaratzean Euskal Argentinak parte hartu du.

- “Registres militaires” delakoen emaitza bilketak jarraitzen du. Alabainan emaitza hauek biziki baliosak dira emigranteen eta familien bilatzeko.

- 2025eko proiektuak aipatuak izan dira. Aurtengo Euskal Astea Tandil herrian iraganen da urri hondarrean eta azaro hastapenean. Zuberotik, Jean Bordaxarren gerizapean, dantzari talde batek parte hartuko du bai bestan baita ere beste herri batzutan eskainiko dituzten ikusgarrietan.

Euskal Argentina, Argentinarako bidaia antolatzeko asmotan dabil. Bidaia hortan parte hartu nahi dutenek Donapaleuko Hbevasion agentziarekin behar dute kontaktuan sartu: agence@hbevasion.com.