Kontseiluaren azken berriak

Huna egin duen azken bilkuran kontseiluak hartu dituen bi delibero nagusiren berri:

Hazparnek, Euskal Elkargoak sortu egitura berezi batean parte hartuko du. Hunek jende elbarrituaren herrira hurbiltzea du helburu. Sail berean erran da Harana gaineko parkinetik eliza saihetsera jiteko igogailua uztailaren 12an estreinatuko dela.

Lekuineko bidean den lur eremu handia erosten ari da EPFL egitura. Lur hori Hazparneko herriak erabiliko du suhiltzaileen kaserna eta jendarmeria berrien eraikitzeko.

Udako astearteak

Herriko Etxeak antolaturik eta herriko elkarte batzuen parte hartzearekin, udan astearte arrastirietan memento goxo baten iragaiteko parada izanen da eliza saihetsean (19:30-21:30). Alabainan dantza, kantu eta musika izanen da aldi oroz, hor berean jateko eta edateko parada eskainiko delarik ere.

Dantza uztailaren 4an ostiralez

Haritz Barneko plazan iraganen da gau berezi hori egitarau anitzarekin: (19:30) dantza zoingehiagoka, ondotik dantza garaikidea Eclosion taldearekin, Flores de Portugaldantzari taldea, "Akelarre" ikusgarria Hegalka konpainiarekin eta bururatzeko Punttu Kakotx.

Jatekoa eta edatekoa aurkituko da tokian berean eta euria balitz gaualdia Harana gelan eginen litzateke.

Kontzertua uztailaren 5ean

Mendixolan koruak Ermend Bonnal taldea gomitatzen du gaualdia elgarrekin eramaiteko. Talde hau Tarnosekoa da eta frango ezaguna. Kontzertua 20:45etan hasiko da eta kitorik da Bihotz Sakratuaren kaperan.

Kermeza uztailaren 12 eta 13an

Karia hortara zozketa aberats baten prestatzen ari dira laguntzaileak, eta beste animazioen artetik, igandean etxera eramaiteko bazkari egina hartzea proposatzen dute 20€-tan. Hortarako tiketak uztailaren 6a arte hartzen ahalko dira Aterbe Onera joanez edo 05-59-70-22-13 zenbakira telefonatuz.

Erretor berria

Dominique Errecart jaun erretora erretretara doa. Azken meza emanen du Hazparnen agorrilaren 17an. Haren ordez, jadanik ezagutua den Blaise Martin Makiza jaun erretora izendatua izan da parropiarat. Hau Congo Brazzavillen sortua da eta 2019tik 2021era apez laguntzaile egona François Dardan parropian.