Laguntzak kirolariendako

Kontseiluko azken bilkuran deliberatu zen goi mailako kirolarientzat laguntza baten emaitea. Huna zer baldintza bete behar den:

- Hazparnen bizi

- Kirola amatur mailan egin

- Bakarkako kirola egin

- Eskualde, nazional edo nazioarteko zoingehiagotan parte hartu eta federakuntzak bide gastuak ez pagatu

Urtean 500€ emanen dira. Hortarako kontratu berezia izenpetuko da.

Kontseilari guziak alde agertu dira.

Saltegi berriak

Arrahartze eta idekitze bat izan dira egia erran. Lehena Lili eta landare saltegia eskuz aldatu da lehengo jabeak erretreta hartu duelakoan. Jondonane plazan zen "Bi liliak", "Le temps d'un Rêve" bilakatu da. Beti sail berean eginen dira salmentak.

Herriko Etxearen ondoan saltegi berria sortu da aldiz. Hau herriak komertsio eskaintza zabaltzeko duen plangintzaren barne egin da: lokala prest-presta eta alokairu merkea, komertsioaren bizigarritasuna frogatu arte. “Efelide” eta “De la Citrouille au Carrosse” deitu apaindura eta bitxiak aurkitzen dira hor.

Haritz Barnen

Apirilaren 25ean (ostirala) eta 28an (igandea) euskal zinema ikusten ahalko da (21:00): Faisaien irla. Asier Urbietaren fikzioa da hau: Jone Laspiur, Sambou Diaby, Itziar Ituño, Josean Bengoetxea, Jon Olivares, Aia Kruse, Ibrahima Kone, Ximun Fuchs eta Rodonny Perriere dira jokalariak.

Faisaien irla, Espainiak eta Frantziak aldizka gobernatzen duten ugartea da. Bidasoaren erdian da, bi estaduak bereizten dituela.

"Laida eta Sambou tokian bizi den bikotea, ugartearen aitzinean promenatzen da. Bet-betan ibaia igerika zeharkatu nahi duten bi pertsona ikusten dituzte... Zonbait egun berantago, gorputz bat agertzen da Bidasoan, justu gobernantza herri batetik bestera pasatzen delarik. Zoin herrik hartuko ditu bere erresponsabilitateak? Bestalde hilotz horrek Sambou eta Laidaren bizi zoriontsua hankaz gora emanen du."

Mus txapelketa

Apirilaren 20an igandez, HAC errugbiaz okupatzen den elkarteak mus txapelketa antolatzen du Mendeala gelan. Izen emaiteak 14:00tan abiatuko dira eta txapelketa bera 15:00etan. Irabazleek 500€-ko saria ukanen dute eta finalistek 250€. Orori idekia da eta jatekoa eta edatekoa izanen da han berean.