"Germanea" etxearen estreinaldia

Ekainaren 20an, Herriko Etxeak plazaren zentroko "Germanea" deitzen den etxea estreinatu zuen, obra luzeak egin eta gero. 1722an altxatua, etxe eder horrek betidanik merkataritzarekin lotura hertsia du. Saltegi edota tailer anitz izan ziren etxe hortan garaian: okindegi, kloska tailerra, zapata denda, ostatu, zurgin, baita notarioaren bulegoa ere. "Anderea" deitzen den andere espos arroparen denda berriak zerrenda hori segituko du, etxearen beherean. Gaineko estaian lau apartamendu berrituak proposatuak dira alokatzeko, alokairu apalean (345€ hilabetero T2-arentzat eta 577€ hilabetero T3-arentzat).

Bukatzeko, enpresak eta proiektuan parte hartzaile guziak eskertuak izan ziren eta adiskidetasun basoa partekatu zuten.

Harri erauntsiak

Harri erauntsi beldurgarriak bota zituzten asteazken arratsaldean. Arraultze tamainako harriek auto eta teila anitz hautsi zituzten bat batean, bereziki plazan eta inguruan. Lambert kartierrean aldiz, bardoztar batzuk ez zuten deus ukan. Erauntsia hasi eta 10 minutura, eguzkia itzuli zen, deus gertatu ez balitz bezala. Kalteak jasan dituztenek Herriko Etxeari erran behar diote, eta berak hondamendi natural eskakizuna eginen du.