Aurtengo martxoaren 3an, Donibane Lohizuneko Begiraleak elkarteak 90 urte bete ditu ofizialki. Elkartearen jarduera 1935eko martxoaren 3an hasi zen euskal kultura eta hizkuntza mantentzeko, garatzeko eta sustatzeko helburuarekin. Horretarako, hainbat aktibitate proposatu ditu elkarteak, antzerkiarekin hasi zen eta urtez urte beste batzuk garatu ziren: kantua, dantza, musika, etno folklorea, literatura, joste tailerrak, mintza xoko, sukaldaritza eta mendi ateraldiak.

90 urteen karira, bi hitzordu nagusi antolatu ditu elkarteak. Lehena “Boga!” dantza, antzerki eta kantu ikusgarria da, maiatzaren 3an (20:00) eta 4an (15:30) emanen dena Tanka gelan. Sartzeak salgai dira HelloAsso webgunean 15€tan helduentzat eta 8€tan haurrentzat (13 urtetik beheiti). Bestea “Begiralekada” gaur egungo eta lehengoko kideekin emanen da, maiatzaren 24an pilota plazan. Sartzeak salgai dira HelloAsso webgunean (5€tan helduentzat, urririk 13 urtetik beheitikoentzat). Gaualdiak segituko du dantzaldia eta Donibane Kantuz saioarekin. Txaranga bat izanen da gaualdia alaitzeko.