Auzo batzordeen biltzarrak

Iragan astean bi auzo batzordeek egin dituzte beren biltzarrak.

Lehena astelehenean Arruntzan Erdiko Etxean Pierrot Rouget hautetsiaren inguruan dozena bat lagunekin. Aipagai nagusia izan da Arruntzako plaza erdiaren berrantolaketaren lanak hasiko direla ekaineko hilabetean, dirudienez diru laguntzak erdietsiak baitira hortarako. Aipatu da ondotik Uztaritzeko aurrekontu parte hartzailean batzordeak finkatu proiektua: Arruntzako eskola ondoan den parkean pausa leku eta haurren josta lekua antolatzea, mahain eta aulki batzuekin. Proiektua lehenik hautetsi batzordearen eskuetan dago eta ondotik ekainean eta uztailean herritarren bozen gain. Biltzarra bukatu da beste galde-erantzun batzuekin. Hurrengo biltzarra finkatua da ekainaren 26an.

Bigarrena biharamunean iragan da Gaztelondoan Purgu Xopolo auzo batzordearena, hamar bat lagun bilduz eta Christelle Larrieu hautetsiarekin. Hemen aipagaiak denetarik izan dira, hondarkin biltzearekin diren arrangurak, bereziki zakarruntzi horiak aski biltzen ez direnak, bainan hau Bil ta Garbi erakundearen eskutan dago. Bideetan, han eta hemen, aurkitzen diren zilo arriskutsuak, Bazterkarrika, Sorgintartea, Ferrondoa karriketan diren tindu seinalatze eskasak, argi publiko zonbaitekin diren kezkak eta ere komun eskasak eliza ondoan eta Dorreako hilerrietan. Aurrekontu parte-hartzaile proiektuetan bereziki finkatu dute hilerrietako komunen eraikitzea. Proiektu hau ere hautetsi batzorde eta herritarren bozen gain dago. Uda hortan jakinen da segida. Hurrengo biltzarra finkatu da uztailaren 30ean.

Pilotaz hitz bat

Kapito Harri pilota batasunak ezagutarazi du Euskal Herriko xapelgoan udaberri huntako plaza laxoko egitaraua joko garbin eta luzean; egutegia ere agertu du. Kimuetarik hasiz helduetaraino zazpi talde izanen dira joko garbin eta lau luzean (gazte talde bat eta hiru heldu). Lehen partidak hasiko dira heldu den asteburu huntan, finalak pentsatuak direla uztail erdiko. Finalen tokiak ez dira oraino ezagutuak. Xapelgo on gure taldeeri.

Igandeko kantaldia

Jondoni Bixintxo elizak ez du bekan baizik ikusten holako jendeketa, nola joan den igande arratsaldean, nun ez den ustegabeko ehorzketa. Kantaldiak 550 bat entzule bildu ditu eliza leporaino betetzerakoan. Kantaldia antolatua zen Jatsun kokatua den Betixut elbarrituen elkartearen faboretan. Aldizka bi talde arizan dira. Hasieran Brililiak taldeak Agur Jauna kantaturik Korsikako Schola Di Cantu taldeak (7 kantari zirela) eman du lehen partea. Lehen partea osoki elizako kantu sakratuez osatua, funtsean bigarren partean ere bat edo beste baziren. Elkarrizketatu kantari batek aitortu du Korsikan bizi diren tokian (Bastia hiritik 50 bat kilometro hegoaldean, mendian) osoki atxikiak direla kristautasunari, betidanik kantaldietan horrela jokatzen dutela. Boz bikainak; potentziala dute guziek bakarlari kantatzeko ere. Euskal kantariak, gizon abesbatza, osatua da 13 lagunez denak Lapurdin herri desberdinetan bizi direnak. Hauek ere ederki segurtatu dute beren partea, kantu batzu gitarraz eta perkusio tresnez lagundurik. Miresgarri ere izan da kantaldia bukatzeko bi taldeek elgarrekin eman Korsikako himnoa: Salve Regina. Kantaldi ondoan publiko guzia gonbidatua zen Bixintxo eskola libroko aterbera zintzur bustitze batentzat. Denak loriaturik gelditu dira.