Hand Ball sala

Baigorrin, hand ball edo eskubaloi gela baten eraikitzeko xedea Herriko Etxean aurkeztu dute joan den astean. Kasik 300 bat neska ditu US Nafarroako taldeak (Akitania Berriko gotorrena da) eta Donibane Garaziko Jai Alain edo Baigorriko ezkerparetan artzen dira orainokoan. Hain zuzen, hunen gibeleko zelaian muntatuko da gela berria, Euskal Elkargoaren laguntzarekin bereziki. 5.630.000 euro gostako du proiektuak. Nahi lituzkete obrak 2027ko maiatzean bururatu.

Amap

Tokiko ekoizleen produktuak furnitzen dituen Amap edo "Baigorriko saskia" egiturak erosle harpidetuak ortzegun arratsalde apal guziz errezibitzen ditu Behereko Plazan, aitzinetik manatua dutenaren banatzeko. Arrakasta ikusiz eta zerbitzua hobetu nahian, saltegi baten idekitzeko xedetan dira orain. "Credit Agricole" bankuaren proiektu deiaren haritik, ereman duten inkestak erakusten du ideia biziki sustengatua dela. Hortaz proposatzen duten galdetegia betetzen ahal da oraino Herriko Etxeko "Panneau Pocket" gunera joanez. Interesatuak balin badira, hortan jakinaraz! Toki bat begiztatua dute jadanik saltegiarentzat eta espero dute buruilean idekitzea.Laguntzaile edo bolondresak beharko dira horren atxikitzeko.

Baigorriko kulturaldia

Kulturaldia aitzina doa. Ondoko hitzorduak:

- Apirilaren 26an (Ibiakoitza) "Xiberoa kantuz loraturik"musikaldia, Bil Etxean (20:30). Kantuak eta irudiak uztartzen dituen ikusgarria, oroimena eta ohidura sorkuntza anitzekin loratuz. Kantuan Maddi Oihenart eta Ihitz Iriarte, kantu eta perkusioan Beñat eta Julen Axiary, txirulan Mixel Etxekopar, klarinetean Nicolas Nageotte eta biolontxeloan Jordi Cassagne.Sartzea 15 eurotan. Ondotik, gaualdia ikastolan Arrano Band taldearekin.- Apirilaren 27an (Igandea) Nafarroaren Eguna. Goiza gaineko plazan, merkatua eta askaria ikastolan (9:00), desfilea behereko plazatik (11:00), ekitaldia elizako plazan (11:30). Arratsaldea behereko plazan, dantza ikusgarri eta kontzertu andana, xehetasunak Basaizea elkarte antolatzaileak plazaratu duen liburuxkan.

- Apirilaren 30ean (Asteazkena) Anariren kontzertua, Izpegiko Behereko Bentan (19:00).

Pilota

- Esku-huska, buruz-buru, Frantziako txapelketako finalerdiak jokatu dira, joan den aste hondarrean eta baginituen 3 jokolari Zaharrer Segitik.

- Junior edo artekoen mailan, Zuraiden, Xalbat Ibarrola (Zaharrer Segi) 40/ Cyril Arambel (Zaharrer Segi) 34. Xalbatek finala heldu den igandean jokatuko du Zuraiden, Lau Herriko Ellande Chapelet-en kontra.

- Helduen lehen mailan, Hazparneko Berrian, Xabi Alcasena (Zaharrer Segi) 23/ Julien Etchegaray (Irisartarrak) 40.