Joan den astelehenean zortzi, irailaren 22an, Aldak Baionako Santespieta auzoko etxebizitza batean ekintza bat antolatu zuen, alokairuen muga arauaren zenbait urraketa salatzeko. Gehiegizko eta arrazoirik gabeko alokairu osagarria, eta urtean 10.692 euroko gain ordainketa salatu dira. Egoera hori “coliving” edo behartutako kolokazio moduan aurkezten da, jabeek etxebizitza krisia baliatuz beren irabaziak handitzeko; baina aldi berean, alokairuen mugaketari buruzko legeria urratuz. Aldak oroitarazi du interes orokorreko neurria errespetatzea ezinbestekoa dela, alokairuen emendatze basatia gelditzeko.

Aldaren arabera, Baionako Santespieta auzoko beheko solairuko etxebizitza osoa alokatu ordez, jabeak gelak banan-banan eskaintzen ditu. Orotara hiru gela proposatzen ditu: bainugela eta komun pribatua dituen gela 720 eurotan, eta komun partekatua duten beste bi gela 545 eta 530 eurotan. Aldako ekintzaileek salatu dute holako ereduek pertsonak elkarrekin bizitzera behartzen dituztela, ondasun bati ahalik eta etekin handiena ateratzeko hautua egiten baita gela banaka alokatzen denean.

Kasu huntan, jabeak 1.795 euro ukaiten ditu hilabetean bere alokairuen bidez, urteko gehiegizko ordainketa 10.692 eurokoa da beraz, kopuru izigarria 80m²-ko T4 baten kasuan.

720 euroko gela alokatzen duen bikotea 2024ko abenduaren 3an sartu zen Baionako Santespieta auzoko etxebizitzara, hain zuzen ere Ipar Euskal Herriko 24 herritan alokairuen prezioa mugatzeko araua indarrean sartu eta 8 egun geroago.

Prefetaren dekretuaren arabera, apartamentu horren tipologiari dagokionez, erreferentziazko alokairua 9,30€/m²-koa da eta gehieneko erreferentzia 11,30€/m²-koa. Gehienez ere, gelaren tamainaren arabera egindako ponderazioarekin, bikoteak 362,60€ ordaindu beharko lituzke. Horren ondorioz, hilabeteko gain ordainketa 357,40€-koa da.

Bikoteak 2024ko martxoaren 4an bidali zion jabeari alokairua jausteko eskaera, baina azken hunek uko egin zion oinarrizko prezioari osagarri moduko bat gehituz.

Aldaren erranetara, jabeek edozein aitzakia balia dezakete prezioa igotzeko, kasu horretan surf taula bat ukaitearena.