Heriotze

Sortzez Anttonenekoa zen Charles Schwendt 87 urtetan pausatu da. Aspaldian Zuraiden bizi, Aljeriako gerlan soldadu izana, Itsasuko bide bazterrean ikusten den Ipar Afrikako gerlari ohien oroitarriaren sortzaileetarik bat izan zen.

Joan den asteazkenean ehortzi dute Baigorriko hilerrian. Doluminak familiari.

Petizio

Joan den astean aipatzen ginauzuen petizioa Baigorrin dabilela egun hauetan, Kathy Etchebarren anderearen sustenguz. Berriki arte, “France services” egiturarentzat lan egiten zuen herriko postan bainan Hazparneko zerbitzura igorria izan da.

Etchebarren andereari sustengua azkartuz doa, berriz Baigorrira jin dadin. Joan den aste hondarrean, petizioak bazituen kasik 1.500 sinadura edo izenpedura bilduak.

Hilarrien apainketa

Euskal hilarrien berritzeko lanak bururatu dira. Herriko Etxeak eskertu nahi ditu hurbildu diren laguntzaile guziak, Lauburu elkartea eta nola ez, familiak.

Haueri esker, 36 hilarri garbituak eta tindatuak izan diragure ondarea zainduz. Heldu den urteko lanetan parte hartzeko norbait prest balin bada edo hilobi bat balin bada tindarazteko, bi kontaktu: animazioa@baigorry.fr edo 06-43-62-23-22.

Gasna salmenta

Aurten ere, Baigorriko ikastolak Eguberriko gasna taulak proposatzen dauzkigu, ez ohizko gasnen jastatzeko parada ezin hobea. Taula ttipia (4 motako taula) 25 euro edo euskotan, taula handia (5 motako taula) 50 euro edo euskotan.

Manaketak abenduaren 15a arte egiten dira, banaketak abenduaren 23an eginen dira ikastolan berean (18:00-19:30). Ordainketa banaketa egunean txekez edo xehez.

Huni loturik, Dom Campistronek ilustratu “tote bag” zakua ere eskura daiteke 8 euro edo euskotan.

Gehiago jakin nahi bada deitu 06-76-32-48-77 zenbakira.

Errugbi

Heldu den igandean, US Nafarroa taldea Baigorriko zelaian ariko da Layrac-en kontra (15:15). Gure jokolariak garaipen baten behar gorrian dira, aitzineko partidako zafraldia eta bi trebatzaileen baztertzearekin gertatu tirabiren ahanzteko.