Han eta Hemen | 2026ko Apirilaren 30a
Azokaroa martxan
Ziburuko Euskal Liburu eta Disko Azokaren 7. edizioa ekainaren 6an iraganen da larunbatarekin. Argia astekaria eta Ziburuko Baltsan elkartearen arteko elkarlanaz antolatua da.
Azoka iragan baino hilabete bat lehenago, Azokaroa iragaiten da. Azokaren atariko gisan, tokiko elkarte batzuekin elkarlanean eta euskara hutsezko sorkuntzaren inguruan, Ziburuko Azokari hedadura handiagoa ematea eta auzo herrietan euskaraz bizi nahi dutenei euskarazko literatura eta kultura gozatzeko arnasgune bat gehiago eskaintzea da xedea.
Ekimena ez da auzo herrietara mugatzen: auzo herrialdera ere zabalduko da, Baigorrin hitzordu bat antolatuko baita. Hedadura hori zabalagoa izanen da, Euskal Irratiek beren estudioetan antolaturiko mahai-ingurua etxe guzietara zabalduko dutelako.
Aurtengo hitzorduak
Azokaren aitzin-gustu gisa beraz, Ipar Euskal Herriko xoko desberdinetan antolatuko dira hainbat ekimen. Lehena Azkainen iraganen da apirilaren 30ean (19:00) Bil Tokin, Jone Bordatoren “Erroen izerdia” (Elkar) liburuaren aurkezpenarekin. Azkaineko irakurle taldeak antolaturik, sartzea urririk izanen da.
Maiatzaren 7an (19:00), galeserari buruzko gaualdia izanen da Ziburuko Baltsan elkartean. Robin Farrar ekintzaile eta irakaslearen hitzaldia izanen da euskaraz, eta ondotik, Gwilym Bowen Rhys kantari musikari galestarraren folk kontzertua. Argia astekaria eta Baltsan kultur elkartea antolatzaile, sartzeak 10 euro kostako du pintxoak barne.
Maiatzaren 16an (12:00), Jon Garmendiaren “Ulhaintsaren negarra” (Elkar) olerki liburuaren errezitaldi musikatua izanen da Ortzi Ohyarçabalen laguntzaz, Urruñako plazan. Ikastolako Euskaraz Bizi taldea antolatzaile, Urruñako Herriko Etxeko kultur zerbitzua partaide, ondotik pintxoak izanen dira.
Maiatzaren 19an (19:00), “Larrialditik iratzarraldira” mahai ingurua Eneko Gorri (Plazara), Intza Gurrutxaga (EHE) eta Iñaki Iurrebasorekin (idazle, soziologoa) Euskal Irratietan.
Maiatzaren 22an (20:00), Baigorriko Boga irakurle taldea eta Basaizeak “Pleibak” Miren Amurizaren bertso saio literarioa antolatuko dute Baigorriko Bixentainean, Miren Artetxe eta Maddi Ane Txoperenarekin, Paule Bilbao musikari izanen delarik. Sartzeak 8 euro kostako du, pintxoak izanen dira ondotik.
Bukatzeko, maiatzaren 28an (19:00), Aritz Ibarraren “Deiadarra” (Nabarralde) liburuaren aurkezpena eginen da Donibane Lohizuneko mediatekan, urririk.
