FRESNO, KALIFORNIA. Fresnon abiatuko da heldu den larunbatean, maiatzaren 2an, Estatu Batuetako 2026ko euskal piknik eta besten sasoina. Fresnoko Euskal Etxea antolatzaile, Campos Anaien Farman eginen da, euskal mezarekin (10:00) hasirik. Programak bilduko ditu kabalkada, euskal dantzariak, klika, pilota, musika, bala, eguerdiz bildots errea eta arratsaldean ogitartekoak. Ez dira mus partidak erefaltako. Giroa berotzeko, bezperan, ostiralean, piknik aitzineko afaria, Etchechurytarren Santa Fe euskal ostatuan. Eta ondotik ere, igandean, euskal gosaria ostatu berean. Baina maiatza beste hiru euskal piknikekin dator: hilaren 17an Los Banosekoa, herriko feria-lekuan; 23 eta 24an, Bakersfieldekoa, “Kern County Basque Club” Euskal Etxearen egoitzan; eta 30ean, beste kostaldean, Connecticuteko Suffield herrian, Riki Lasaren farman, “New England Basque Club” Euskal Etxearen besta. Aipatuko ditugu horiek eta beste batzuk geroago ere.

BUFFALO, WYOMING. Wyomingeko Gilletten, baina Buffaloko “Big Horn Basque Club” Euskal Etxeko jende eta “Zaharrer Segi” dantzariekin, Artzainen Urteroko 5. jaialdia eginen dute maiatzaren 9an. Estatuan hain hedatua zen artzaintzari lotu besta huntan euskaldunek partaidetza handia dute. Ikusgai izanen dira karro kanpoak, David Romtvedt euskal musikari eta poetak gure historia eta musika azalduko ditu, Caminotarrek lukainka prestatu eta zerbitzatuko dute, artzain-zakurren erakustaldia eginen da, joko eta jolasak, eskulanak... egun oso bat gustuan pasatzeko artzainen bizimolde eta ohiduren inguruan, Rockpile Museoa antolatzaile.

CHINO, KALIFORNIA. Hiru hilabete eta egun guti baizik ez dira falta 2026ko NABO Biltzar Nagusi eta Euskal Besta Chinon egin dadin, “Southern California Basque Club” (SCBC) Euskal Etxearen 80. urteurrenaren karietara bertan antolatua. Oroitu uztailaren 3tik 5era ospatuko dutela, lehenengo bi egunetan Centro Basco ostatuan, eta hirugarrenean, igandean, Chinoko azoka-lekuan. Lehenik, NABOk bere urteko biltzar nagusia eginen du eta behar da erran NABO Udalekua ere Chinon eginen dela, haurren hondarreko emanaldia larunbatean eskainirik. Programako parte, pilota partidak, mus txapelketa, dantzarien emanaldiak, meza euskaraz aita Anttonek emana, txaranga, Fresnoko “Izen Gabe” musika taldea, txapelketak (euskal pastiza, irrintzi, zahato eta beste), klika, zozketak, Amerikanuak banda... Argibide gehiago nahi duenak hemen harrapatzen ahal du: socalbasque.org.