Atharri txapelketa joko berrin

Esku Pilota zirkuituko joko berriko lehen txapelketa ginuen Itsasun iragan asteburuan. Ostegun arratsean jokatu dira bi finalerdiak. Lehen partidan Mathieu Ospital eta Andoni Iphar aisesko nagusitu zaiote, 40 eta 11, Eñaut Etxeberria eta Ellande Orhategaray bikoteari. Bigarren partidan berdintsu, Betti Gurruchaga eta Battitta Ducassouk aisesko irabazi dute, 40 eta 15, Etcheverry eta Saint-Paul-en kontra.

Eta finala zen beraz igande goizean. Azkenean, Mathieu Ospital eta Andoni Iphar-ek irabazi dute, Betti Gurruchaga eta Baptiste Ducassouren kontra nagusituz 40 eta 26. Kosta egin zaiote piska bat irabazleei partidan sartzea, 12-7 gibeletik ziren. Baina 14tan berdindu eta, handik aitzina Ospital eta Iphar-ek gaina hartu dute 40-26 nagusitzeko. Beharbada elgarri hobeki uztartu dira zerbait gisaz erraiteko.

Beti bezala, jendalde ederra bildu da partida hauetan. Ongi gozatu ere ondoko aperitifa eta bazkaria!

“Bi arnas” dokumentala

Maiatzaren 7an, ostegun huntan (19:00), Sanoki gelan “Bi arnas” dokumentala proiektatua izanen da. “Bi arnas” dokumentala tortura-lekukotasuna da: injustiziaren kontra hitz egin zuen pertsona baten istorioa eta sekula gertatu ez zen elkarrizketa baten kontakizuna da.

Filma bi emazteei buruzkoa da: ama, Maria Nieves Díaz eta torturaturiko alaba, Iratxe Sorzabal.

Ondotik Arnominduak taldeak gaualdia segurtatuko du. Jatekoa eta edatekoa izanen da tokian berean. Sartzea prezio librean. “Goooxoan” elkarteak antolaturik.

Lore eta landare merkatua

Urte guziz bezala, San Josep eskola pribatuak antolatzen du lore eta landare merkatua. Ostiral huntan, maiatzaren 8an, iraganen da (9:00-16:00), Herriko Etxeko aparkalekuan.