Estatua Hendaiako dosierrak aztertzeko prest

Kotte Ecenarro auzapezak, Chantal Kehrig-Cottençon lehen auzapezordearekin batera, Jean-Marie Girier Pirinio Atlantikoetako prefeta eta Mathieu Duhamel Baionako suprefeta errezibitu ditu Hendaiako lurraldeko erronka nagusien inguruko lan bilkura batean.

Etxebizitza eta finantza-orekak, segurtasuna eta langile kopuruaren indartzea, artamenduen eskuragarritasuna eta osasun-eskaintza izan dira aipatu diren gai nagusiak. Solasaldi konstruktibo horiek herria eta estatuak hendaiarren zerbitzuko duten elkarren arteko engaiamendua erakusten dute.

Kontzertua

Maiatzaren 13an (20:30), Jurgi Ekizak bere “Argitzala” disko berria Mendi Zolanen aurkeztuko du. Sartzea 4,50 eta 12,50 euroren artean kostako du.

Hernandorena sariketa

Hendaiako Enbata gaztetxean jokatu da Hernandorena sariketako bigarren eta azken sailkatze saioa. Honako bertsolari hauek aritu dira kantuan Amaiur Lujanbio gai emailearen gidaritzapean: Johane Larre, June Aiestaran, Irantzu Idoate, Irati Alcantarilla, Sabin Abarrategi eta Izaro Bilbao. Epaile lanetan Zuhaitz Olazabal eta Abel Zabala ari izan dira.

Irati Alcantarilla izan da saioko garailea eta June Aiestaranekin batera zuzenean sailkatu da Uztaritzeko finaleko. Honenbestez erabakita gelditu da finaleko seikotearen izen zerrenda: Nahia Etxeberri, Kattin Madariaga, Irati Alcantarilla, June Aiestaran, Izaro Bilbao eta Irantzu Idoate.

Finala maiatzaren 9an izanen da Uztaritzeko Latsa gelan (19:00).