“Geroa eraikiz” lemapean 43. Herri Urrats

Maiatzaren 10ean, milaka euskaltzalez beteko da beste behin ere Senpereko aintzira besta giroan Seaskari laguntza ekarri nahian. “Laku Bat Orroka” abestiaren bideoklipak, Eñaut Castagnet-ek zuzendurikoak, gonbidapena zabaltzen dauku. Hemen aurkitu dugu lakuetako uretatik jalgitzen igela erraldoi bat, aurtengo “maskota” segurenik. Betiko egitarau aberatsarekin dugu hitzordua, animazio nasaiki leku desberdinetan. Aurtengo diru sarrerak, Donapaleu herrian eraikia izanen den Seaskako bigarren lizeoari bideratuko zaizkio. Berezitasunetan ere, txartelaren balioak 0,05€-ko emendapen ttipia hartuko du.

Antzerkia Larrekon larunbatean

Jainkoaren sekretuetan gira “Les confidences de Dieu” antzerkiarekin, Herri Urrats bezperan aurkeztuko dena, maiatzaren 9an (21:00). Leher egina delakoaz, Jainkoak azken indarrak eszenatokian botatzen ditu gaurko munduari buruzko behako irringarri dramatikoa eginik. Erlijioa, amodioa, politika, boterea, Luzifer, dena aipagai etenik gabe. Irringarria, hunkigarria, garratza, Farid-ek ikuskizun berezia eta gaurkoa eskaintzen digu. Prezio osoa 20€, murriztua 15€, erreserba: https://www.billetreduc.com gunean.

Ganibet egileen eguna

Maiatzaren 14ko ostegunean (9:00-18:00), Senpere bilakatuko da sua, metala eta jestuaren antzokia, Arbaso elkartearen ekimenez. Tradizioa eta sorkuntza uztartuz, hamabost ganibet egile eta arotzek beren mundu zorrotza azalduko daukute, biziaraziz beren pasionea. Salbuespenez, Iruneko “Forjas Brun” aspaldiko arotzek, lehengo aroztegi edo oleten barna murgiltzera proposatuko daukute, garai bateko materialarekin.Hauen saihetsean, hogei artisau eta ekoizlek aberastuko dute eguna beren tokiko sorkuntza eta ekoizpenekin. Egunean zehar, erakustaldi, tailer eta harremanek nabarituko dute lanbide bizidun horien sentsua geroari beha. 11:00etan eskainia izanen den haurren tailerrak lagunduko ditu beren sortze jeinuaren azaltzera. “Sarrakari” danborradak alaituko du ekitaldia, hunen ondoan auto zaharren elkarretaratzea ikusgai izanen da. Ostatu eta janari lekuan bertan.

Herriko kontseilua

Azkeneko herri kontseiluan, finantzen inguruko bilkura eztabaidatsua izan da. Ikusiz finantzen egoera kezkagarria, zonbait erabaki latzen hartzera bortxatuak izan dira hautetsiak. Hala nola, senpertarren zergak %3z emendatuko dira, elizako lanak gibelatuak, herriko 110km-ko bideen konpontze lanekere ez dute lehentasunik ukanen. Aitzineko agintarien erabaki ez aski gogoetatuek sobera gastu sorturik, gaur egun maniobratzeko leku guti uzten dute. Elhorga bere aldetik saiatu da defenditzea bere jokamoldea. Elkarteei bideratu diru laguntzak guti gorabehera mantenituak dira. Bilkura bururatzean, bertze anitz herritan bezala, mozio baten izenpetzea proposatua izan zaie hautetsiei, hunek galdegiten duelarik aukera baxoko ahozko handia (grand oral) euskaraz pasatzeko, baita matematika azterketak.

Maiatzaren 8ko zeremonia

Ohiko ekitaldia abiatuko da Herriko Etxetik (10:15), meza (10:30), hilen oroitarrian iraganen da usaiako zeremonia (11:30) Emak Hor-eko musika baita eskoletako haurren parte hartzearekin. Ondotik tragotxoa eskainia da Herriko Etxean.

Mus lehiaketa

Ostiralean, maiatzaren 8an (14:00), Xabatene gelan, Gantxikiren saihetsean, mus lehiaketa interesgarria, Senpereko gazte komiteak antolatua. Izen ematea deituz: 06-35-25-73-57 edo bertan (13:00), 12€ pertsonaka parte hartzea. 300€ irabazleentzat eta 100€ finalistentzat.