Joan den ostegunean zamaketa lanetan ari zela 61 urteko langilea zendu zen Zamudioko (Bizkaia) Ugaldeguren III industrialdean Eurobots Industrial Machinery Export enpresan. Langilea kamioia deskargatzen ari zela, zamak jo eta beherean harrapaturik gelditu zen. Suhiltzaileek eta sokorriek ez zuten haren bizia salbatu ahal ukan. Sindikatuek garraio sailaren segurtasun eza eta prebentzio eskasa gaitzetsi dituzte eta salaketa manifestaldia deitu. Ertzaintzak ikerketa abiarazi du, istripuaren nondik norakoen argitzeko. LAB sindikatuak egin zenbaketaren arabera, aurten lan istripuz hil den 25. langilea da Zamudiokoa. ELAk, berriz, lan istripuen ondoriozko 17 heriotza zenbatu ditu orain arte, eta hamazortzigarrena litzateke joan den ostegunekoa.

170 milioi euroko aurrekontua duen mihi-arrainaren hazteko proiektua aurkeztu berri du Eusko Jaurlaritzak. Zentral nuklearra izan behar zuen eta ur-untziak osorik dituen Lemoiz (Bizkaia) herriko Basorda itsas-bazterrean egiteko asmoa dute. Haztegiak finantzaketa publiko-pribatua izanen du, eta hamar urte beharko dira horren garatzeko. Imanol Pradales Jaurlaritzako lehendakariak egitasmoaren aurkezpenean zehaztu zuenez, 2030ean helduko dira merkatura Lemoizen hazi lehen mihi-arrainak. Bultzatzaileen ustez, haztegiak berrehun lanpostu sortuko ditu eta urtean 3.000 tona arrainekoiztekogaitasuna ukanen du.

Bere aldetik, Greenpeace talde ekologista arranguraturik agertu da. Mihi-arrain haztegiak Lemoizko zentralaren inguruan diren babes bereziko eremuak arriskuan jarriko dituela uste du. Hori dela eta, Eusko Jaurlaritzari egitasmoaren ezeztatzeko eta kostaldea gerizatuko duen plana abian ezartzeko eskatu dio Greenpeacek.

Behin-behineko espetxe zigorra ezarri diotebikotekidea hiltzen saiatzeagatik joan den ostiralean Donostian atxilotu zuten gizonari. Eusko Jaurlaritzako Segurtasun Sailak azaldu zuenez, Ertzaintzak bikotekidea itotzeko ahaleginak egiten atzeman zuen 26 urteko gizona, ostiral goizaldean, Donostiako etxe batean. Erasoa geldiarazi zuten, eta gizona atxilotu.Joan den ibiakoitzetik Martuteneko presondegian da.

Joan den larunbatean Almadiaren eguna ospatu zuten Burgin 34. aldiz. Oihangintzako ekonomian sartzen zen almadia lehen, ezen oihanean moztu enborrak garraiatzeko sistema baitzen. Udaberrian karreatzen ohi ziren trunkoak, ur emaria handitzen zenean, manera horretan egurra tonaka jaisten ahal baitzen ibaian behera. Aizkolariek egurra ahal bezain fite saltzea zuten helburua eta Nafarroan ez bazuten lortzen, Zaragozaraino heltzen ahal ziren.Aurten haatik, Ezka ibaian ur guti baitzen almadia zainek aski lan ukan dute untziak errekan beheiti gelditu gabe kurriarazteko. Bestalde, aspaldiko bizi maneren erakusgarri, latsariaren lana ere antzeztu zuten erreka bazterrean Burgin, joan den larunbatean.

Euskalgintzaren Kontseiluak euskararen kontra azkenaldian sortu diren ahotsei erantzunaren emateko eta euskaraz bizitzeko eskubidearen eta hautuaren aldarrikatzeko “Euskaltzaleon Martxa” antolatuko du datorren ekainaren 13an. “Azken hamarkadetan berreskurapen ziklo bat gertatu den arren, gero eta gehiago dira euskararen etorkizunaren gaineko kezka eta larritasuna adierazten dituzten datuak eta ikerketak”, adierazi dute ekitaldiaren aurkezpenean. Manifestaldia Iruñean izanen da ekainaren 13an (17:00).

Hamabost urte zituelarik, Mitxel Longaron Tolosako Sakre taldean hasi zen, rock musika progresiboa jotzen zuela. 1978an disko bakarra atera eta gero, taldea desegin zen. Ondotik, Mitxel Longaron-ek beste hainbat proiektutan jo zuen urte luzetan: hala nola Imanol Larzabalekin, 21 Japonesas eta Duncan Dhu musika taldeekin, eta azken urteotan Postal Kolekzionistak-en. Longaron Itoiz taldeko bateria-joilea izan zen “Ezekiel” diskoan. Horietaz gain, Mitxel Longaronen musikari-ibilbidea luze bezain aberatsa izan zen.Fito & Fitipaldisekin eta Extremodurorekin gidari gisa egin zituen birak, eta, zenbait aldiz, Joan Manuel SerratenetaJoaquin Sabinaren bandetan ere egin zituen halako lanak. Bestalde, Coti Argentinako kantaria lagundu zuen behin baino gehiagotan.Nazioarteko musika-birak gibelean utzirik, Tolosara itzulirik, Mitxel Longaron berriz hasi zen baterian eta Iker Laurobaren bandan eta Postal Kolekzionistak taldean arizan zen zenbait urtez.Mitxel Longaron 1966an sortua...

Iberdrola multinazionalak duen arte obren bildumako 138 artelan Bilboko Arte Ederren Museoan erakutsiko dira 2026ko agorrilaren 30a arte. Erakusketa “Paraleloak eta meridianoak” deitzen da eta zortzi atal tematikotan antolatua da. Hala nola, natura, urak eta ildoak, gorputza eta aztarnak, lana, argia, artista eta haren espazioak, arkitektura eta eraikuntza eta hiria eta portua. Bestalde, Iberdrola dorrean bisita egiteko parada izanen da larunbat guziz, aitzinetik izena emanez. Iberdrolak 125 urte betetzen ditu aurten eta karia horretara du bere bilduma publikoari zabaltzen. Euskal artista klasikoetan, besteak beste Aurelio Arteta, Eduardo Txillida, Agustin Ibarrola edota Jorge Oteizaren lanak ditu. Sortzaile garaikideetan aldiz, Cristina Iglesias, Txomin Badiola, Pello Irazu, Ibon Aranberri, Itziar Okaraz edota June Cresporen margoak, zizelak edo argazkiak atzeman daitezke.