Euskal trail

Gure mendietan gaindiko lasterketak manerarik zailenetan iragan dira, Salbatoreko aste hondar luzean: hotza, euria, harria eta elurrarekin ere toki gorenetan. Hortako, Autza eta Ahadiko kaskoak saihestea erabaki dute antolatzaileek. Hauek buru hauste anitz ukan dituzte ere ehunka autoen aparkarazteko, horrentzat pentsatuak ziren errugbi zelai zaharra bezalako leku anitz ezin erabiliak bilakatu direlakoz lohiarengatik. Beribil metatze luzeak beraz bide bazterretan. Hastapenean 3.800 lasterkari balin baziren 6 proba desberdinetan parte hartzeko, hauetarik anitzek ez dute heiena bururatu ahal izan, baldintza sobera dorpeak zirelakotz.

Mereximendu bera edo berdin gehiago ukan dute mendietan barreiaturik zauden ehunka laguntzaileek (kasik 500 ziren orotara), ez baitzitaiken errex hozturik eta bustirik egoitea orenak eta orenak mugitu gabe, kirolarien zerbitzuko. Sailkapen guziak Euskal Trail elkartearen webgunean aurki daitezke.

Herriko Etxearen aldizkaria

Bere lehen aldizkaria plazaratu du herriko kontseilu berriak, lehenik eskerrak bihurtuz hauteskundetan konfiantza egin dakoten guzieri. Gero, deia luzatu daukute herritar guzieri, komisione desberdinetan engaia gaitezen, erregularki edo noizbehinka, bakotxaren gogoaren arabera, Baigorri zuzenki hunkituko duten erabakiak elgarren artean hartzeko. Gaineko karrikako antolaketa berria zehazten dute eta gerlako hilen oroitarriaren lekuz aldatzeari dagokionez, soldadu ohien adostasunarekin egin dute, zeremoniak leku segurago eta isilagoan iraganarazteko eta Mitxelengo bide juntako obrak errexteko.

Azkenik, aldizkariak jakinarazten dauku 14 sortze, 4 ezkontza eta 28 heriotze izan direla jaz gure herrian.

Irakurketa taldea

Miren Amuriza idazlea izanen da aldi huntako gomita. “Pleibak” bere liburu berria aurkeztuko du, Miren Artetxe eta Maddi Ane Txoperena bertsulari eta Paule Bilbao musikariaren laguntzarekin. Hitzordu hau Basaizea elkartea, Argia astekaria eta Ziburuko liburu azokaren partzuergoarekin antolatua da. Baigorriko Bixentainean, maiatzaren 22an ortziralean (20:00). Ekitaldia aitzin, pintxo eta trago (19:00).

Antzerkia

Maiatzaren 23an, ibiakoitzarekin (19:00), “Kolapsoa” antzerkia ikusten ahalko dugu Bil Etxea gelan, Jon Ander Urrestik ekoiztu lana.

Gaia: publizitate agentzia bateko hiru langile umoreaz baliatuko dira gaur egungo marketin sistemari kritika egiteko. Antolatzaile Baigorriko herria eta Udalbiltza.

Lurdeko beila

Ekainaren 13an iraganen da ibiakoitzarekin eta parte hartu nahi dutenek izena Peio Curutcharryri (06-42-00-50-08) edo Oronos saltegian eman behar dute, ekainaren 1eko berantenaz. Lurdera joateko autobusa Baigorritik abiatuko da eta 55 eurokoa izanen da gosta saria.