Erretretadunek mobilizatzen segitzen dute, Gasteizen manifestatu dute. Pentsiorik apalenak Espainiako estatuko SMI gutieneko soldatarekin parekatzeko galdea egin dute. Euskal Herriko Pentsiodunen Mugimenduak iaztik aldarrikapen hori eramaten du, baina irailean EAJk, PSE-EEk eta Voxek eskaera hori baztertu zuten. Pentsiodunak mespretxatuta sentitu ziren, manifestazioan gogorarazi dute sindikatuen eta jendartearen babes handia dutela, 145.142 herritarren sinadura erdietsi dute. Pentsio apalak emendatzeko beharra sekulan baino handiagoa dela adierazi dute, gerlaren ondorioz bizitzaren kostua azkar emendatu dela argumentatuz. Zioten: “Erosketa saskiko oinarrizko produktuak %40ez baino gehiago kariotu dira. Argia, gasa, etxebizitza eta menpekotasuna ere ikaragarri garestitu dira”. Erretreta apalak dituztenen kopuru handia emazteak direla oroitarazi dute. Pentsiodunen mugimenduak Jaurlaritzari hiru eskaera egin dizkio. Batetik, SMIarekin...

Udalerri euskaldunen mankomunitateak eta Otxandioko Herriko Etxeak antolaturik, “Udalerri Euskaldunen Eguna” Otxandion ospatua izan da (Bizkaia). 121 Herriko Etxe UEMAn dira. Antolatu egunean errana izan da: “Udalerri euskaldun guzien eguna da, ez UEMAko kide direnena soilik”. Gaur egun, guzira 175 udalerri euskaradun inguru dira, biztanleen %70etik gora euskaraz hitzegiten dute.

Joseba Lozano Eusko Jaurlaritzako Herri Administrazioetan Hizkuntza Normalizatzeko zuzendaria, Isaac Amezaga Bizkaiko Foru Aldundiko Euskara zuzendaria eta Aingeru Mimentza Euskalgintzaren Kontseiluko komunikazio arduraduna, 125 bat auzapez eta hautetsirekin batera, bertan bildu dira. Martin Aramendi UEMAko lehendakaria etorkizuneko erronkez mintzatu da, ezinbestekotzat jo du euskararen sustatzeko urgentziazko hamar neurri lehenbailehen indarrean jartzea.

Azken egunetan Gasteizko elizbarrutian giroa anitz mindu da, apez talde baten eta Juan Carlos Elizalde apezpikuaren arteko mezu gurutzatuen ondorioz. 52 apezek gutun bat bidali diote Gasteizko Elizaren buruari, “autoritatez” jokatzea leporatzen diote, bai eta azken urteetan diozesa muturreko jarreretara eramana izatea salatzen dute. Gutunean, apezek diote “umiliatuta eta etsituak sentitzen gara”, ondorioz mesfidantza giroa sortua da. Kritiken artean, apezpikuak Arabako seminariora ekarri dituen apezgaien profila ere aipatua da. Ondorioz, etsipena eta kezka handitu dira.

Juan Carlos Elizalde apezpikuak entzun kritikak biziki gaizki hartu ditu, akusazio guziak ukatu ditu. Apez taldearen jarrera gaitzetsi du, “alferrak izatea eta bazterrak nahasten” aritzea leporatu die.

Aspaldiko ohidurak segituz, 1785ean Elizondon izenpetu eta 1856an berretsi akordioaren haritik, Erro, Baztan, Erroibar eta Baigorriko hazleek urria arte Sorogaineko alhapidetara beren behiak eramaten dituzte. Aurten urria arte Erroibarreko 18 hazlek 277 zaldi eta 398 behi bortura eraman dituzte. Maiatzaren 23an, Urepeleko markaren ondotik, Baigorri araneko hazleen aldi izanen da: 140 bat behi buru sartuko dira Sorogaineko zerkoan. Uztailean kabala gehiago sartuko da, ardien aldi izanen baita.

ADEGIren azken txostenaren arabera, Gipuzkoan unibertsitateko %47a diplomaduna da eta Goi Mailako Lanbide Heziketako tituludunak %20. Guzira, ikerketaren arabera, unibertsitateko ikasketak egin dituztenek 4.700 lan kontratu inguru ordezkatzen dute, 1.900 inguru Goi Mailako Lanbide Heziketa, 2.400 Erdi Mailako Lanbide Heziketarako eta 900 inguru batxilergoa ala maila apalagoa dutenenak. Aipatzen da diplomadunen galdea handia dela, zientziari, teknologiari, ingeniaritzari eta matematikari lotu ikasketena. Kontratazio gehienak industria-ingeniaritzan, elektronikan, informatikan, datuen kudeaketan, adimen artifizialean, ziber-segurtasunean eta multimedia arloan dira. Goi Mailako Lanbide Heziketan, gehien eskatzen diren arloak fabrikazio mekanikoa, elektrizitatea eta elektronika, informatika eta komunikazioak, instalazioak eta mantentze lanak eta enpresen kudeaketan dira.

Gipuzkoan, 2026rako sektore pribatuan 9.900 lan kontratu inguru aurreikusiak dira, horietan 4.600 enplegu...

Nafarroako Alesbesen kokatzen den Riberporc enpresak Corella herrian urde gizendegi proiektua aurkeztu du, urtean 7.232 urde gizentzeko ahalmena ukanen du. Corellako Herriko Etxea proiektuaren kontra agertu da, airearen eta uraren kutsadura, pixa ala ongarri usainak jasan beharko dituzte herritarrek. “Proiektuak ez dio ezer ekartzen lurraldeari salbu kontaminazioa eta bizi kalitatea kaltetzea”.