Ezpeletako Biper sindikatua joan den astean bi gertakariren inguruan bildu da. Afrikako delegazioa errezebitu du eta egun batzuk berantago Euskal Herriko biper ekoizle sindikatuen artean "RetPIM" izenarekin sortu sarea aurkeztu du.

Afrikako delegazioa Ezpeletako biper ekoizleekin

Kamerun, Ginea, Boli Kosta, Benin eta Senegaletik etorri delegazioa, Ezpeletako Biper sindikatuarekin bildu da. Beren produktuen Adierazpen Geografikoa (GI) hobeki garatzeko eta komunikazioa indartzen hobetzeko etorriak ziren.

Astebeteko egonaldian, Ezpeletako AOP piper sindikatuko Panpi Olaizola presidenteak, Maialen Sarraude animatzaileak eta Pauline Champon teknikariak Afrikako delegazioa gidatu dute. Adostu da larrazkenean 25 herriren artean formazio bat plantan jartzea.

Benineko ekoizleak zenbait ekoizpen mota erregistratzeko fasean dira, anana ez da oraindik bere etiketapean saltzen, bere IG erregistratua egon arte. Boli Kostako gerripeko jantzia ekoizteko Afrikako artisau produktu bakarra da IG apelazioa duena, 6.000 ehule dira, bost sailetan banatuak. Identifikatutako beste GI bat, Penja piper zuria da. Eskualde berean lau piper mota ekoizten dira, zuria, beltza, gorria eta berdea, fabrikatzeko prozesuaren arabera kolorea aldatzen da. Kooperatiba sortua dute. Ezpeletako piperraren sindikatuaren gobernantza sistemaz, egituraketaz, barne kontrolaz eta haien komunikazio sistemaz ikasi dute.

Euskal Herriko biper ekoizleak bateratu

RetPIM izeneko sare berriaren baitan, hemendik goiti, Ezpeletako, Lodosako (Nafarroa) eta Gernikako (Bizkaia) biper sindikatuak bateratu dira. Martxoaren 12an, Ezpeletan hiru biper sindikatuek aurkeztu dute elkarrekin lantzeko sare berria. Lan ildoak finkatu dituzte: eragin ekonomikoa, teknika eta produktuaren lanketaren trazabilitatea dira landuak izanen. Panpi Olaizola Ezpeletako biper sindikatuko presidenteak zioen, Iparraldeko Biper Eztia eta Gipuzkoako Ibarrako Biperra ere sarean sartzeko xedetan direla.

Ezpeletako biper sindikatuaren lokalean egin den abiatze agerraldian, ordezkariek baliabideak partekatu eta indarrak batzearen beharra azpimarratu dute, bakoitzak bere aldetik erronka eta arazo beretan lan egin beharrean. Panpi Olaizolak erran dauku bateratzeak ahalbidetuko duela eritasunen kontra babestea, bai eta ere biper merkatuan diren tranpak geldiaraztea.

Akitania Berria/Euskadi/Nafarroa Euroeskualdeak bere gain hartu du ekimen hunen aurrekontuaren erdia finantzatzeko ardura. Leyre Azcona, Euroeskualdeko erakundeko arduradunak, denboran irauteaz gain, lankidetza berriak baliabide eta praktika batzuk elkarbanatzea ekarriko duela espero du. Proiektua formalizatu duen prentsaurrekoaren ondotik, tokiko biperraren ekoizleek lehen atelierra hasi dute, beren esperientziak eta ikuspuntuak partekatuz, desberdinak zein amankomunak.

Biper ekoizleak baikor agertzen badira, merkatuak atxikitzen duelako, arrangura handiagoak dituzte langileen ukaiteko eta hauentzat egoitzak atzemaiteko.