Herriko kontseilua

Martxoaren 21ean iraganen da, Elgar zentroan (20:00). Huna zer diren aipagaiak, besteak beste:

Finantzak: jazko konduen kudeaketa onartzea, 2024koen aurrekondu nagusia bozkatzea, tokiko zerga tasen finkatzea, haurtzaindegiko jazko konduen kudeaketa eta 2024ko aurrekondua bozkatzea,

2024ko diru laguntzak, Herriko Sozial Zerbitzu Zentroaren laguntzak...

Administrazio orokorra: bideozaintza dispositibo baten onartzea.

Kultura: kultur aste baten antolatzea.

Heziketa: Lurraldeko Heziketa Proiektua onartzea.

Bizitegiak: OPAH RU hitzarmenaren onartzea.

Zinema

Egun bereziak izanen dira hilabete huntan zineman: film laburren egunak (20tik 26ra).

Hemen gaindi eginak diren film laburrak ikusten ahalko dira usaiako filma aitzin. Zernahi gai: itsasoa, mendia, hartza, arrainak...

Zinemaren udaberria iraganen da ere hiru egunez: martxoaren 24, 25 eta 26an, edozein filmarentzat 5€ pagatuko da.

Erakusketa

Hilabete guzian irauten duen Régis Pochelu artistaren erakusketaren karietara, ibilaldi gidatua antolatua da larunbatean, martxoaren 23an (15:00) kanpoan erakutsiak diren eskulturen inguruan.

Hazparneko suhiltzaileek 100 urte!

Ikusiz Hazparnen eta inguruan sute anitz bazela, 1924an, orduko Herriko Etxeak deliberatu zuen tokian berean suhiltzaile batzu izan behar zirela, hamabi gizon hautatu ziren hortarako... Sortze horren ospatzeko oraiko suhiltzaileek pesta berezia antolatzen dute, martxoaren 23an: afaria eta dantzaldia Harana ezker paretan. Edantza taldeak du animatuko. Afaria 25€tan da.

Izenaren emaiteko mezu bat igorri 07-83-66-03-95 zenbakira.

Kalakaldia euskaraz

Oraindik bada Miñan liburuaren irakurtzeko denbora: alabainan Hazparne Aldeko Irakurle Klubaren gomitari jarraikiz Amets Arzallus Antia mediatekan izanen da martxoaren 30ean (10:00) nahi duenarekin solastatzeko.

Ibrahima Balde ginearrak ahoz kondatua, Ametsek letraz idatzi du. Bakarrik entzutera jin daiteke eta menturaz irakurle talde horren eta ondoko egunetan irakurtuko denaz berri hartzera.