Joan den larunbatean, Eusko Eguna Ezpeletan iragan da. Egun horretan Eusko moneta ospatzeaz gain, tokiko beste eragile batzuen ezagutzeko parada izan da. Ipar Euskal Herriko ekonomia tokian berean bultzatzeko xedearekin sortu elkarteak, zirkuitu laburreko eragileak bildu ditu. Eusko moneta erabiliz, tokiko enplegua eta hurbileko merkataritza bultzatzen da.

Gisa horretako ekonomia garatzeko modeloa ez da berria. 1970eko hamarkadan, N. Georgescu, ekonomialari eta matematikari errumaniarrak, "bio-ekonomia" deitu kontzeptu berria sortu zuen, gaur egun bereziki "décroissant" izenburuarekin ezaguna. Jendarte zuzen eta hobe baten nahian, mugimendu batzuek alternatibak proposatzen dituzte, beren eguneroko bizitza aldatu dituztenak.

Ikuspegi hori, eredu politiko, ekonomiko eta sozial batean oinarritzen da, aberastasuna banatuz sozial berdintasuna lortzea. Helburu bakarra da produktibitate intentsiboa eta kontsumitzeko manera apaltzea. Bestelako ekonomia modelo horrek energien eta baliabideen erabilera murrizteko xedea du. Tokian berean ekoiztu, erosi eta jan!

Noiz arte segitzen ahal dugu gaurko sistema kontsumitzailearekin? Jendarteak xahutzeko mugak gainditu ditu.

Garai batez supermerkatuek arrakasta baldin bazuten, kontsumitzaileak, erosketak egiterakoan, modu berrien aldeko hautua eta parioa egiten ari dira. Hipermerkatuetako kontsumo masibo horrek jendartean eragin kaltegarriak ukan ditu, bereziki janariaren kalitatean. Osasunaz eta ingurumenaz kezkatuak izanez, familia anitz hurbileko laborarien ekoizpenak kontsumitzen hasi dira.

Teknologia berriak kudeatzen dituztenek, kontsumitzera behartzeko, anitz jukutria plantan jarri dituzte. Izan jantziak, etxetresna elektrikoak eta beste hainbat puska erosteko tentazioak denetan agertzen dira. Propaganda kudeatzen duten Tech multinazional horiek, gu ohargabean, kontsumitzera diktatzen gaituzte. Estatuak baino boteretsuagoak dira, gure eguneroko bizitzan sartuak baitira. Nork ez du tarteka erosteko errabia? Bat batean tresna bat baitezpadakoa, soineko berri bat ezinbestekoa... armairuak gainezka direnean!

Euskal Moneta elkartearen helburua ez da tokiko monetarekin irabaziak egitea, baizik eta Ipar Euskal Herriko eragileekin elkarlanean tokiko ekonomia sustatzea. Instituzio publikoak finantza egoera zailean direla entzuten da, laguntza anitz murriztuak dira, joan den larunbatean Ezpeletan beste eredu ekonomiko bat posible dela erakutsia izan da.