Herriz Herri - Bardoze (L) | 2025eko Otsailaren 06a
Zirko Txotx kabareta - Bardozeko ihautea
Zirko Txotx kabareta
Zirkozale eta sagardozale anitz bildu ziren pasa den ostiralean Bardozeko ezkerparetan Zirko Txotx kabaretaz gozatzeko. Euskal Herritik edo urrunagotik etorritako artistek eskuketa, akrobaziak edota musika proposatu zioten publikoari.
Segidan, ikusle zein artistek momentu goxoa partekatu zuten sagardo kupelaren inguruan, eta Ziliportaka elkarteak prestatu zituen pintxoekin. Gaualdia ongi borobiltzeko, Armiarma konpainiak suzko eskuketa ikusgarri ederrarekin ikusleak liluratu zituen kanpoan.
Bardozeko ihautea
Gure herriko ihautea hasiko da otsailaren 8an. Musikariak, Kaskarotak eta Maskak etxez etxe ibiliko dira, Bardozeko kartierretan zehar. Ihauteria bukatuko da otsailaren 15ean, herriko plazan. Pertsonaia guziak hor izanen dira, bai eta Zan Pantzarren auzia ere.
Arratsaldeko 17:00etan emana da hitzordua desfilearentzat. Zan Pantzarren auziaren ondotik, hainbat dantza eta kantu emanak izanen dira. Bardozen Kantuz eta mutxikoak ere izanen dira, Punpeka taldearekin.
