Ipar Euskal Herriko Mugimendu Abertzaleak, apirilaren 20an Donibane Garazin antolatuko du Aberri Eguna, "Elgarrekin, Herria, Burujabetza" lemapean.

Aberri Eguna

Azken bi urteetan Itsasun eta Uztaritzen egin bezala, aurten Donibane Garazin ospatuko da Aberri Eguna. 2022 eta 2024 urteen artean, Ipar Euskal Herriko mugimendu abertzaleak gogoeta partekatua egin zuen Bagira prozesuaren baitan. Joan den urteko martxoaren 31n Uztaritzen ospatu zen Aberri Egunean, Bagirak bere ibilbideari bukaera eman zion, abertzaleen eskuetan"Herri Bidea" izeneko bide-orri amankomunautziz. Bagirak "Ortzimuga herriari boterea itzultzea dela" idatzi zuen gogoeta prozesu horren barnean. Horrez gain, Euskal Herriak "burujabetza politiko mailarik altuena" bereganatzea eta "tresna instituzionalak eskaintzea" ezinbestekoa dela azpimarratu zuen dokumentu amankomun horretan. Ipar Euskal Herriko Mugimendu Abertzaleak urte hastapenean iragarri zuenez, bide-orri horren garapena lantzen segitzeko hainbat eragile eta sektore desberdinetako pertsonak elkargune batean bildu dira.

Azken bi urtetako ekimenen ildo beretik, aurtengo Aberri Eguna ere molde bateratuan antolatua izanen da.

Egoera korapilatsua

Ipar Euskal Herriko Mugimendu Abertzalearen erranetara, Aberri Eguna mundu mailako egoera korapilatsu batean heldu da, hau da krisi klimatiko, sozial, kultural, politiko eta demokratikoekin. Mundu osoan zehar eskuin muturra indartzen ari dela aipatua izan da, Euskal Herriak ondorio zuzenak pairatzen dituela. Egoera horren parean, jendarte solidario, jasangarri, euskaldun eta demokratikoa lortu behar dela zioten. Parean diren desafio handiei aurre egiteko, Ipar Euskal Herriak behar dituen tresna guziak ez baditu ere, aitzinamendu berriak egin behar direla aipatua izan da, burujabetza lortzeko, identitate kolektiboa azkartzeko eta erabakiak lurraldean hartu ahal izateko.

Gaur egungo krisi testuinguruan, Euskal Herriak anbizioa erakustea eta bere burujabetzaren bidean pauso berriak egitea ezinbestekoa agertu da.

Aurtengo egitaraua

Aberri Egunean zehar, hainbat ekimen antolatuko dira: elkarteen herrixka (9:00), manifestazioa (11:00), bazkaria (14:00), herri kirolak Gaia elkartearekin (15:00) eta Foisis, Zetkin eta Kontrabanda taldeen kontzertuak (17:00). Taloak, edatekoa edo puzgarriak egonen dira egunean zehar.

Laguntzaile izateko edo bazkarian parte hartzeko, estekak "IEHko Aberri Eguna" Facebook orrian aurki daitezke.