TANDIL, ARGENTINA. Iragan igandean hasi zen Buenos Aires probintziako Tandilen 2025eko Euskal Argentinar Aste Nazionala. Bistan da ez dugula oraino argazki eta berri adierazgarririk, programako zati nagusia ondoko egunetan eta asteburuan izanen baita, baina HERRIA ere hor egonen delarik, ukanen dugu heldu den asteko zenbakian argazki eta kronika ustez ederrik, hasteko klarki ikusi baitugu zoin ahalegin handia egiten ari diren Tandilgo Gure Etxea Euskal Etxeko bazkideak, emankor eta ekarpentsu izaten, heien erantzukizun den aurtengo edizioan. Biba, bai, Diasporako gure gazteak... eta gure heldu eta zaharrak, belaunaldi guziak elgarren lankide baita posible honelako besta handi bat Tandilen muntatzea!

Bizkitartean, aipa ditzagun heldu den asteko beste hitzordu batzuk. Txileko Santiagon, “Euskal Kontzertua” deitu saioa eskaini dute asteazken huntan “Txileko Euskal Gizataldea” Euskal Etxeko koralak eta dantza taldeak. Hiri berean, hileko lehen ebiakoitz oro bezala urritik, “Hilario Olazaran Txileko Teatro eta Txistu Taldeak” kalejirak joko ditu hiriburuaren bihotza den Arma Plazan, bi txistu, atabal eta akordeonez. Egun berean, Valentzian, Euskal Etxeko eta Hizkuntza Eskola Ofizialeko “Euskara Ikasleen Topaketa” antolatu dute Euskal Etxean (11:00), bilkuretan “Euskara praktikatzeko dinamikak” solasgai, hitzaldia “Euskara ikasi eta euskaraz bizi” gaiaz eta herri bazkari bat programan. Itsasoz bestaldean, Kaliforniako Bakersfield-en, “Baztandarren Topaketa” edo “Baztan Reunion” Wool Growers euskal ostatuan, Idoya Urruty eta Maite Maizterrena antolatzaile.

Berriz ere itsasoa zeharkaturik, igandean, Palma Mallorcakoan, Euskal Herria eta Uruguairen arteko elkartasun eta ahaidetze ekitaldia iragarri du Artea Euskal Etxeak Son Rapinya Pilotalekuan. Eguerdian abiaturik, Txalaparta Tailerra eginen dute Euskal Etxeko txalapartariekin; Pilota Tailerra, bertako eta Uruguaiko lagunekin; "Dos Orillas" murga uruguaitarrak emanaldia eskainiko du; eta jardunaldia, pintxo-pote bat partekaturik bururatuko da. Egun berean, baina Idahoko Boisen, AEBn, euskal komunitatean hil direnak gogoan, “Memorial Mass” meza gauzatuko dute (14:00) (aurten Risen Christ elizan), bertako euskaldunek, azken 29 urteetan urte guziz egin bezala. Mezaren ondotik, familia eta lagunen, eta komunitateko kideen, elgarretaratzea, bakotxak eraman janari eta edariekin. Duela astebete ber bilkura egin zuen San Frantziskon, AEB mailan, Gure Euskal Etxeak, online emanik.