Frantziako banakako esku-huska finalera iritsi zen Antton Ithursarry, Bardozeko Uhaldean taldearen jokalari gaztea. Itsasuko ezkerparetan gertatu zen partida, Ruben Bordagarayren kontra, 10 punttuko bi mantxaz. Gaizki hasi zen partida Anttonentzat, nahiz eta bere familia eta lagunen sustengua ukan zuen. Izan ere, lehen mantxa hiru eta hamar galdu zuen Anttonek.

Pausan, Thibault Bidart bere entrenatzaileak eman zizkion aholku onak eta horri esker bere konfiantza eta bere jokoa berreskuratu zituen Anttonek. Desberdintasun gehiagorekin jokatu zuen bigarren mantxa, eta irabazi zuen hamar eta zazpi.

Beraz azken bost punttuko mantxa behar zen jokatu bi jokalarien arteko berdinketa hausteko. Aitzinean hasten zen Ruben, hiru eta bat. Bainan Anttonek ez zuen galdu nahi eta bere indar guziak bota zituen partidan, eta azkenean berdin ziren bi jokalariak, lau puntturekin.

Publiko guziak bere hatsa atxiki zuen azken punttuarentzat, bainan maleruski Anttonen pilota marraren azpira pasatzen zen eta epaileak "falta" erran zuen. Horrela bukatu zen gure jokalariaren abentura Frantziako txapelketan. Harro izaten ahal da, Uhaldean taldearen koloreak duinki beztitu zituelako.