Herriz Herri - Aiziritze-Gamue-Zohazti (NB) | 2026ko Urtarrilaren 08a
Lur Berriko biltzar nagusia
Lur Berri Kooperatibak bere urteko biltzar nagusia azaroaren 28an egin du Aiziritzeko egoitzan. Éric Narbais-Jauréguy lehendakariak 2024/2025 urteko aktibitateen bilduma aurkeztu du, Frédéric Hialé zuzendari nagusiaren eta Martine Chaleon idazkari nagusiaren laguntzarekin. 90 urte laster beteko dituen Kooperatibaren historia oroitarazia izan da. Bere peko diren adarrak hiru arlotan sailkatuak dira: laborantza, laborantzako elikagaia eta banaketa. Gaur egungo testuingurua eta ildo estrategikoak azalduak izan dira biltzar nagusian.
Lur Berri kooperatiba 1936an sortu zen. 5.100 laborari elkartzen ditu Frantzia hegoaldean. Kooperatibak berak 476 langile ditu eta talde osoak 3.753. 2024/2025 urteko negozio zenbatekoa 507 milioi eurokoa izan da kooperatiban eta 1.342 milioi talde osoan.











